koi samjhega kya raaz-e-gulshan

koī samjhegā kyā rāz-e-gulshan

jab tak uljhe na kāñToñ se dāman

qalb-e-parvāna kī uf re dhaḌkan

ḳhud-baḳhud ho ga.ī sham.a raushan

kaise paa.e koī terā maskan

raah roke haiñ shaiḳh-o-barhaman

azmat-e-āshiyāna baḌhā dī

barq ko dost samjhūñ ki dushman

yak-ba-yak sāmne aa na jaanā

ruk na jaaye kahīñ dil kī dhaḌkan

vo haiñ sharminda apne karam par

maiñ pashemāñ huuñ phailā ke dāman

itnī ārā.ish-e-āshiyāna

TuuT jaaye na shāḳh-e-nasheman

gul to gul ḳhaar tak chun liye haiñ

phir bhī ḳhālī hai gulchīñ kā dāman

kitnī bebāk haiñ ārzūeñ

ishq kā yaad aatā hai bachpan

in guloñ se to kāñTe hī achchhe

jin se hotī hai tauhīn-e-gulshan

ai 'fanā' husn par miT ke tū ne

kar diiyā ishq kā naam raushan

koi samjhega kya raaz-e-gulshan

jab tak uljhe na kanTon se daman

qalb-e-parwana ki uf re dhaDkan

KHud-baKHud ho gai shama raushan

kaise pae koi tera maskan

rah roke hain shaiKH-o-barhaman

azmat-e-ashiyana baDha di

barq ko dost samjhun ki dushman

yak-ba-yak samne aa na jaana

ruk na jaye kahin dil ki dhaDkan

wo hain sharminda apne karam par

main pasheman hun phaila ke daman

itni aaraish-e-ashiyana

TuT jaye na shaKH-e-nasheman

gul to gul KHar tak chun liye hain

phir bhi KHali hai gulchin ka daman

kitni bebak hain aarzuen

ishq ka yaad aata hai bachpan

in gulon se to kanTe hi achchhe

jin se hoti hai tauhin-e-gulshan

ai 'fanā' husn par miT ke tu ne

kar diya ishq ka nam raushan