کوئی سمجھے گا کیا راز گلشن

کوئی سمجھے گا کیا راز گلشن

جب تک الجھے نہ کانٹوں سے دامن

قلب پروانہ کی اف رے دھڑکن

خود بخود ہو گئی شمع روشن

کیسے پائے کوئی تیرا مسکن

راہ روکے ہیں شیخ و برہمن

عظمت آشیانہ بڑھا دی

برق کو دوست سمجھوں کہ دشمن

یک بیک سامنے آ نہ جانا

رک نہ جائے کہیں دل کی دھڑکن

وہ ہیں شرمندہ اپنے کرم پر

میں پشیماں ہوں پھیلا کے دامن

اتنی آرائش آشیانہ

ٹوٹ جائے نہ شاخ نشیمن

گل تو گل خار تک چن لئے ہیں

پھر بھی خالی ہے گلچیں کا دامن

کتنی بے باک ہیں آرزوئیں

عشق کا یاد آتا ہے بچپن

ان گلوں سے تو کانٹے ہی اچھے

جن سے ہوتی ہے توہین گلشن

اے فناؔ حسن پر مٹ کے تو نے

کر دیا عشق کا نام روشن