saqiya tu ne mere zarf ko samjha kya hai

sāqiyā tū ne mire zarf ko samjhā kyā hai

zahr pī lūñgā tire haath se sahbā kyā hai

maiñ chalā aayā tirā husn-e-taġhāful le kar

ab tirī anjuman-e-nāz meñ rakhā kyā hai

na bagūle haiñ na kāñTe haiñ na dīvāna haiñ

ab to sahrā kā faqat naam hai sahrā kyā hai

ho ke māyūs-e-vafā tark-e-vafā to kar luuñ

lekin is tark-e-vafā kā bhī bharosa kyā hai

koī pāband-e-mohabbat hī batā saktā hai

ek dīvāne kā zanjīr se rishta kyā hai

sāqiyā kal ke liye maiñ to na rakkhūñgā sharāb

tere hote hue andesha-e-fardā kyā hai

merī tasvīr ġhazal hai koī ā.īna nahīñ

saiñkaḌoñ ruḳh haiñ abhī aap ne dekhā kyā hai

sāf-goī meñ to sunte haiñ 'fanā' hai mash.hūr

dekhnā ye hai tire muñh pe vo kahtā kyā hai

saqiya tu ne mere zarf ko samjha kya hai

zahr pi lunga tere hath se sahba kya hai

main chala aaya tera husn-e-taghaful le kar

ab teri anjuman-e-naz mein rakha kya hai

na bagule hain na kanTe hain na diwana hain

ab to sahra ka faqat nam hai sahra kya hai

ho ke mayus-e-wafa tark-e-wafa to kar lun

lekin is tark-e-wafa ka bhi bharosa kya hai

koi paband-e-mohabbat hi bata sakta hai

ek diwane ka zanjir se rishta kya hai

saqiya kal ke liye main to na rakkhunga sharab

tere hote hue andesha-e-farda kya hai

meri taswir ghazal hai koi aaina nahin

sainkaDon ruKH hain abhi aap ne dekha kya hai

saf-goi mein to sunte hain 'fana' hai mashhur

dekhna ye hai tere munh pe wo kahta kya hai