faqat qaziya yahī hai fann-e-tabī aur ilāhī meñ

faqat qaziya yahī hai fann-e-tab.ī aur ilāhī meñ

jo ilm-e-ma.arifat chāhe to rah yād-e-ilāhī meñ

samajhtā hai usī kā jalva-gah ġhaib-e-shahādat ko

nahīñ kuchh farq aarif ko safedī o siyāhī meñ

nahīñ ārām mujh ko iztirāb-e-dil se siine meñ

ki dariyā muztarib hotā hai betābī-e-māhī meñ

na kar mastoñ se kāvish har ghaḌī āmān kahtā huuñ

ḳhalal aa jā.egā zāhid tirī ismat-panāhī meñ

jagā kar ḳhvāb-e-āsā.ish se 'bedār' aah hastī meñ

adam-āsūdgāñ ko lā ke Daalā hai tabāhī meñ

jo kaifiyyat hai mastī se tirī āñkhoñ kī laalī meñ

nahīñ vo nashsha-e-rañgīñ sharāb-e-portugalī meñ

sar-o-barg-e-ḳhushī ai gul-badan tujh bin kahāñ mujh ko

gulistān-e-dil aayā fauj-e-ġham kī pā.emālī meñ

dur-e-dandāñ hue the maujzan kis bahr-e-ḳhūbī ke

ki motī sharm se paanī hue silk-e-la.ālī meñ

jahāñ vo shakkarīñ-lab guftugū meñ aave ai tuutī

suḳhan sarsabz terā kab ho vaañ shīrīñ-maqālī meñ

abas hai ārzū-e-ḳhush-dilī 'bedār' gardūñ se

mai-e-rāhat jo chāhe so kahāñ is jām-e-ḳhālī meñ

faqat qaziya yahī hai fann-e-tabī aur ilāhī meñ

jo ilm-e-marifat chāhe to rah yād-e-ilāhī meñ

samajhtā hai usī kā jalwa-gah ġhaib-e-shahādat ko

nahīñ kuchh farq aarif ko safedī o siyāhī meñ

nahīñ ārām mujh ko iztirāb-e-dil se sine meñ

ki dariyā muztarib hotā hai betābī-e-māhī meñ

na kar mastoñ se kāwish har ghaḌī āmān kahtā huñ

ḳhalal aa jāegā zāhid tirī ismat-panāhī meñ

jagā kar ḳhwāb-e-āsāish se 'bedār' aah hastī meñ

adam-āsūdgāñ ko lā ke Dalā hai tabāhī meñ

jo kaifiyyat hai mastī se tirī āñkhoñ kī lalī meñ

nahīñ wo nashsha-e-rañgīñ sharāb-e-portugalī meñ

sar-o-barg-e-ḳhushī ai gul-badan tujh bin kahāñ mujh ko

gulistān-e-dil aayā fauj-e-ġham kī pāemālī meñ

dur-e-dandāñ hue the maujzan kis bahr-e-ḳhūbī ke

ki motī sharm se panī hue silk-e-laālī meñ

jahāñ wo shakkarīñ-lab guftugū meñ aawe ai tutī

suḳhan sarsabz terā kab ho wañ shīrīñ-maqālī meñ

abas hai ārzū-e-ḳhush-dilī 'bedār' gardūñ se

mai-e-rāhat jo chāhe so kahāñ is jām-e-ḳhālī meñ