saqi teri sharab mein ab wo asar nahin

saaqī terī sharāb meñ ab vo asar nahīñ

ham be-ḳhabar nahīñ haiñ tujhe ye ḳhabar nahīñ

sāġhar ba-rang-e-dīda-e-ahmar ho raqs meñ

ye kār-e-husn hai koī kār-e-hunar nahīñ

roz-e-azal se 'ishq ko jis kī rahī talāsh

vo husn bas vahīñ hai jahāñ par nazar nahīñ

so jā ki shab-gazīda ufuq par nazar na jaa.e

ai chashm-e-nīm-vā tirī ḳhātir sahar nahīñ

vo aable nahīñ ki charāġhāñ hoñ sañg-e-mīl

raahī nahīñ haiñ shauq nahīñ rahguzar nahīñ

poshīda zer-e-ātish-e-izhār hai jo ġham

ye dard dard-e-dil bhī nahīñ dard-e-sar nahīñ

shabnam lipaT ke barg-e-tamannā se ro paḌī

kahte hue hamāre liye ab sahar nahīñ

'maḳhfī' haiñ ramz mā'nī-e-harf-o-bayān ke

is majlis-e-sukHan meñ koī dīda-var nahīñ

saqi teri sharab mein ab wo asar nahin

hum be-KHabar nahin hain tujhe ye KHabar nahin

saghar ba-rang-e-dida-e-ahmar ho raqs mein

ye kar-e-husn hai koi kar-e-hunar nahin

roz-e-azal se 'ishq ko jis ki rahi talash

wo husn bas wahin hai jahan par nazar nahin

so ja ki shab-gazida ufuq par nazar na jae

ai chashm-e-nim-wa teri KHatir sahar nahin

wo aable nahin ki charaghan hon sang-e-mil

rahi nahin hain shauq nahin rahguzar nahin

poshida zer-e-atish-e-izhaar hai jo gham

ye dard dard-e-dil bhi nahin dard-e-sar nahin

shabnam lipaT ke barg-e-tamanna se ro paDi

kahte hue hamare liye ab sahar nahin

'maKHfi' hain ramz ma'ni-e-harf-o-bayan ke

is majlis-e-sukHan mein koi dida-war nahin