dil dhaDkanon ki zarb se mismar to nahin

dil dhaḌkanoñ kī zarb se mismār to nahīñ

dīvār-e-kā'ba Dhahne ko tayār to nahīñ

baaqī rahī na tishna dahānī surūr kī

ye ehtimām-e-mahfil-e-aġhyār to nahīñ

bastī ujaaḌ dil kī hai hastī tabāh-kun

chāragaroñ ne kar diyā bīmār to nahīñ

sad-haif lutf-e-lams-e-salāsil na mil sakā

āzād dil-o-jāñ raheñ asrār to nahīñ

pāband kar rahī haiñ nigāhoñ kī Doriyāñ

dosh-e-brāhman pe ye zunnār to nahīñ

shāyad jigar ke zaḳhm se phāhā sarak gayā

yuuñ hī vo chashm-e-tar huī añgār to nahīñ

sahrā sarāb-e-dasht-e-junūñ ābla-ravī

ik mere naqsh-e-pā ke talab-gār to nahīñ

ḳhāmosh lab haiñ chashm-e-sadaf zulf shikva-gīr

'maḳhfī' ye un se 'ishq kā iz.hār to nahīñ

dil dhaDkanon ki zarb se mismar to nahin

diwar-e-ka'ba Dhahne ko tayar to nahin

baqi rahi na tishna dahani surur ki

ye ehtimam-e-mahfil-e-aghyar to nahin

basti ujaD dil ki hai hasti tabah-kun

chaaragaron ne kar diya bimar to nahin

sad-haif lutf-e-lams-e-salasil na mil saka

aazad dil-o-jaan rahen asrar to nahin

paband kar rahi hain nigahon ki Doriyan

dosh-e-brahman pe ye zunnar to nahin

shayad jigar ke zaKHm se phaha sarak gaya

yun hi wo chashm-e-tar hui angar to nahin

sahra sarab-e-dasht-e-junun aabla-rawi

ek mere naqsh-e-pa ke talab-gar to nahin

KHamosh lab hain chashm-e-sadaf zulf shikwa-gir

'maKHfi' ye un se 'ishq ka izhaar to nahin