tera husn hi jalwa-gar dekhti hai

tirā husn hī jalva-gar dekhtī hai

ye chashm-e-mohabbat jidhar dekhtī hai

ye kyā DhūñDhtī hai kidhar dekhtī hai

kise un kī nīchī nazar dekhtī hai

jo jaltī hai bikhre hue āñsuoñ meñ

vahī sham.a rañg-e-sahar dekhtī hai

qafas har taraf se añdherā kiye hai

nasheman ko phir bhī nazar dekhtī hai

charāġhāñ nazar aatā hai āñsuoñ meñ

mohabbat kī duniyā jidhar dekhtī hai

mire āshiyāne kī ho ḳhair yā rab

ye bijlī na jaane kidhar dekhtī hai

sitāroñ kī ghaTtī huī raushnī meñ

ye duniyā mujhe be-ḳhabar dekhtī hai

jhapaktī to hai aañkh sūraj ke aage

shu’āoñ kī tezī magar dekhtī hai

dil-e-muztarib se jo ai 'fazl' nikle

vahī āh-e-pur-ġham asar dekhtī hai

tera husn hi jalwa-gar dekhti hai

ye chashm-e-mohabbat jidhar dekhti hai

ye kya DhunDhti hai kidhar dekhti hai

kise un ki nichi nazar dekhti hai

jo jalti hai bikhre hue aansuon mein

wahi shama rang-e-sahar dekhti hai

qafas har taraf se andhera kiye hai

nasheman ko phir bhi nazar dekhti hai

charaghan nazar aata hai aansuon mein

mohabbat ki duniya jidhar dekhti hai

mere aashiyane ki ho KHair ya rab

ye bijli na jaane kidhar dekhti hai

sitaron ki ghaTti hui raushni mein

ye duniya mujhe be-KHabar dekhti hai

jhapakti to hai aankh suraj ke aage

shu’aon ki tezi magar dekhti hai

dil-e-muztarib se jo ai 'fazl' nikle

wahi aah-e-pur-gham asar dekhti hai