ترا حسن ہی جلوہ گر دیکھتی ہے

ترا حسن ہی جلوہ گر دیکھتی ہے

یہ چشم محبت جدھر دیکھتی ہے

یہ کیا ڈھونڈھتی ہے کدھر دیکھتی ہے

کسے ان کی نیچی نظر دیکھتی ہے

جو جلتی ہے بکھرے ہوئے آنسوؤں میں

وہی شمع رنگ سحر دیکھتی ہے

قفس ہر طرف سے اندھیرا کیے ہے

نشیمن کو پھر بھی نظر دیکھتی ہے

چراغاں نظر آتا ہے آنسوؤں میں

محبت کی دنیا جدھر دیکھتی ہے

مرے آشیانے کی ہو خیر یا رب

یہ بجلی نہ جانے کدھر دیکھتی ہے

ستاروں کی گھٹتی ہوئی روشنی میں

یہ دنیا مجھے بے خبر دیکھتی ہے

جھپکتی تو ہے آنکھ سورج کے آگے

شعاعوں کی تیزی مگر دیکھتی ہے

دل مضطرب سے جو اے فضلؔ نکلے

وہی آہ پر غم اثر دیکھتی ہے