baDha hai zauq-e-sajda ek kashish si pai jati hai

baḌhā hai zauq-e-sajda ik kashish sī paa.ī jaatī hai

jabīñ khīñch kar tumhāre āstāñ tak aa.ī jaatī hai

qiyāmat kī nazar hai chāñd se Takrā.ī jaatī hai

jhukā lo apnī āñkheñ chāñdnī sharmā.ī jaatī hai

ye kis ne kahte-kahte rok dī hai dāstāñ apnī

zamīñ se āsmāñ tak ik udāsī chhā.ī jaatī hai

na dil meñ ḳhuun baaqī hai na ab āñkhoñ meñ aañsū haiñ

magar ab tak mire dāman pe surḳhī paa.ī jaatī hai

junūñ kī intihā ko jab zamāna jāñch letā hai

hamīñ se phir hamārī dāstāñ dohrā.ī jaatī hai

yahī rañg-e-zamāna aur yahī nazm-e-gulistāñ hai

chaTaktī hai kalī koī koī murjhā.ī jaatī hai

udhar tāḳhīr sī hotī hai daur-e-jām chalne meñ

idhar añgḌā.ī par añgḌā.ī saaqī aa.ī jaatī hai

nazar se duur hai sāhil talātum-ḳhez maujeñ haiñ

sambhāl ai nā-ḳhudā kashtī-e-dil Takrā.ī jaatī hai

zamāna ho chukā chhoḌe hue ai 'fazl' ulfat ko

magar ab tak rag-e-dil meñ khaTak sī paa.ī jaatī hai

baDha hai zauq-e-sajda ek kashish si pai jati hai

jabin khinch kar tumhaare aastan tak aai jati hai

qiyamat ki nazar hai chand se Takrai jati hai

jhuka lo apni aankhen chandni sharmai jati hai

ye kis ne kahte-kahte rok di hai dastan apni

zamin se aasman tak ek udasi chhai jati hai

na dil mein KHun baqi hai na ab aankhon mein aansu hain

magar ab tak mere daman pe surKHi pai jati hai

junun ki intiha ko jab zamana jaanch leta hai

hamin se phir hamari dastan dohrai jati hai

yahi rang-e-zamana aur yahi nazm-e-gulistan hai

chaTakti hai kali koi koi murjhai jati hai

udhar taKHir si hoti hai daur-e-jam chalne mein

idhar angDai par angDai saqi aai jati hai

nazar se dur hai sahil talatum-KHez maujen hain

sambhaal ai na-KHuda kashti-e-dil Takrai jati hai

zamana ho chuka chhoDe hue ai 'fazl' ulfat ko

magar ab tak rag-e-dil mein khaTak si pai jati hai