taron mein husn-e-gul mein latafat nahin rahi

tāroñ meñ husn-e-gul meñ latāfat nahīñ rahī

tum kyā ga.e chaman meñ mohabbat nahīñ rahī

uThā jo dard sham.a kī lau kāñpne lagī

parvāna jāntā thā ki hiddat nahīñ rahī

vo bhī zamīn hī ke muqaddar ko sauñp dī

gardish kī āsmān meñ tāqat nahīñ rahī

gahre gunāh shāmil-e-aḳhlāq ho ga.e

achchhā huā ki fikr-e-qiyāmat nahīñ rahī

badlī nigāh-e-husn to badlā mizāj-e-'ishq

donoñ samajh ga.e ki mohabbat nahīñ rahī

ab āñsuoñ meñ kyā kahūñ afsāna-e-hayāt

dāman meñ jazb karne kī quvvat nahīñ rahī

jis ko tasavvurāt-e-haqīqat se rabt thā

ab vo bhī raushnī shab-e-furqat nahīñ rahī

ab bhī ragoñ meñ dauḌtā phirtā hai soz-e-'ishq

kyuuñ kar kahūñ ki dil meñ mohabbat nahīñ rahī

ai 'fazl' hai vo rāh-e-mohabbat kā ik charāġh

jis dil meñ ḳhuun rah gayā hasrat nahīñ rahī

taron mein husn-e-gul mein latafat nahin rahi

tum kya gae chaman mein mohabbat nahin rahi

uTha jo dard shama ki lau kanpne lagi

parwana jaanta tha ki hiddat nahin rahi

wo bhi zamin hi ke muqaddar ko saunp di

gardish ki aasman mein taqat nahin rahi

gahre gunah shamil-e-aKHlaq ho gae

achchha hua ki fikr-e-qiyamat nahin rahi

badli nigah-e-husn to badla mizaj-e-'ishq

donon samajh gae ki mohabbat nahin rahi

ab aansuon mein kya kahun afsana-e-hayat

daman mein jazb karne ki quwwat nahin rahi

jis ko tasawwuraat-e-haqiqat se rabt tha

ab wo bhi raushni shab-e-furqat nahin rahi

ab bhi ragon mein dauDta phirta hai soz-e-'ishq

kyun kar kahun ki dil mein mohabbat nahin rahi

ai 'fazl' hai wo rah-e-mohabbat ka ek charagh

jis dil mein KHun rah gaya hasrat nahin rahi