subh se pahle hi ho jati hai sham-e-zindagi

sub.h se pahle hī ho jaatī hai shām-e-zindagī

be-talab ke bhī chhalak jaatā hai jām-e-zindagī

husn kī 'azmat se miltā hai payām-e-zindagī

bikhrī zulfoñ se ulajh jaatī hai shām-e-zindagī

manzileñ miltī rahīñ lekin na Thahrā rāh-rau

tere hī dar par nazar aayā maqām-e-zindagī

har nafs ko hai taġhayyur har taġhayyur ko fanā

maut yaad aane lagī aayā jo nām-e-zindagī

rishta-e-hastī ko toḌā rabt-o-zabt 'ishq ne

maut bhī sharmā ga.ī sun kar salām-e-zindagī

rafta-rafta bujhe jaate haiñ tasavvur ke charāġh

muntashir hone ko hai shāyad nizām-e-zindagī

āñsuoñ kī aab se kar lī murattab dāstāñ

merī ḳhāmoshī ko jo samjhe kalām-e-zindagī

ban na jaa.eñ dil kī dhaḌkan terī lo kī juñbisheñ

ai charāġh-e-sub.h ho jaa.e na shām-e-zindagī

har qadam par dekhne ke baad hastī kā mizāj

phir bhī kab samjhā koī tarz-e-ḳhirām-e-zindagī

kuchh añdhere se simaT aate haiñ nazroñ ke qarīb

'fazl' ke lab par agar aatā hai nām-e-zindagī

subh se pahle hi ho jati hai sham-e-zindagi

be-talab ke bhi chhalak jata hai jam-e-zindagi

husn ki 'azmat se milta hai payam-e-zindagi

bikhri zulfon se ulajh jati hai sham-e-zindagi

manzilen milti rahin lekin na Thahra rah-rau

tere hi dar par nazar aaya maqam-e-zindagi

har nafs ko hai taghayyur har taghayyur ko fana

maut yaad aane lagi aaya jo nam-e-zindagi

rishta-e-hasti ko toDa rabt-o-zabt 'ishq ne

maut bhi sharma gai sun kar salam-e-zindagi

rafta-rafta bujhe jate hain tasawwur ke charagh

muntashir hone ko hai shayad nizam-e-zindagi

aansuon ki aab se kar li murattab dastan

meri KHamoshi ko jo samjhe kalam-e-zindagi

ban na jaen dil ki dhaDkan teri lo ki junbishen

ai charagh-e-subh ho jae na sham-e-zindagi

har qadam par dekhne ke baad hasti ka mizaj

phir bhi kab samjha koi tarz-e-KHiram-e-zindagi

kuchh andhere se simaT aate hain nazron ke qarib

'fazl' ke lab par agar aata hai nam-e-zindagi