fikr isko na kar jalwa-gah-e-naz kahan hai

fikr is kī na kar jalva-gāh-e-nāz kahāñ hai

ye dekh ab koī nazar-bāz kahāñ hai

juz shāhid-e-fitrat koī dam-sāz kahāñ hai

maiñ raaz huuñ us kā mirā hamrāz kahāñ hai

kyuuñ ai dil-e-muztar hue kyā vo tire naale

ai sāz-e-shikasta tirī āvāz kahāñ hai

ab apne tasavvur meñ uḌā phirtā hai gulshan

taqdīr-e-asīrī par parvāz kahāñ hai

kaunain kā hāsil liye phirte haiñ farishte

yārab ye bahā-e-dil-e-be-āz kahāñ hai

hamle se tire pahle thā pahlū meñ dil aur ab

ye kaun batā.e nigah-e-nāz kahāñ hai

ḳhud-sāzī meñ masrūf-e-ḳhudā.ī hai 'sulaimāñ'

duniyā meñ koī mard-e-ḳhudā-sāz kahāñ hai

fikr is ki na kar jalwa-gah-e-naz kahan hai

ye dekh ab koi nazar-baz kahan hai

juz shahid-e-fitrat koi dam-saz kahan hai

main raaz hun us ka mera hamraaz kahan hai

kyun ai dil-e-muztar hue kya wo tere nale

ai saz-e-shikasta teri aawaz kahan hai

ab apne tasawwur mein uDa phirta hai gulshan

taqdir-e-asiri par parwaz kahan hai

kaunain ka hasil liye phirte hain farishte

yarab ye baha-e-dil-e-be-az kahan hai

hamle se tere pahle tha pahlu mein dil aur ab

ye kaun batae nigah-e-naz kahan hai

KHud-sazi mein masruf-e-KHudai hai 'sulaiman'

duniya mein koi mard-e-KHuda-saz kahan hai