gesu ruKH-e-raushan se wo Talne nahin dete

gesū ruḳh-e-raushan se vo Talne nahīñ dete

din hote hue dhuup nikalne nahīñ dete

āñchal meñ chhupā lete haiñ sham-e-ruḳh-e-raushan

parvāne to jal jaa.eñ vo jalne nahīñ dete

bikhrā dī vahīñ zulf zarā ruḳh se jo sarkī

kyā raat Dhale raat vo Dhalne nahīñ dete

kis darja haiñ be-dard tire hijr ke sadme

dil ko tirī yādoñ se bahalne nahīñ dete

dekhā hai jise bhī vo girāte haiñ nazar se

chāhe bhī sambhalnā to sambhalne nahīñ dete

gulshan pe udāsī kī fazā dekh rahā huuñ

vo dard ke mausam ko badalne nahīñ dete

be-rāh na kyūñkar hoñ bhalā rahrav-e-manzil

jab rāh-numā raah pe chalne nahīñ dete

vo sāmne hote haiñ to hotā hai ye aalam

armān machalte haiñ machalne nahīñ dete

gesu ruKH-e-raushan se wo Talne nahin dete

din hote hue dhup nikalne nahin dete

aanchal mein chhupa lete hain sham-e-ruKH-e-raushan

parwane to jal jaen wo jalne nahin dete

bikhra di wahin zulf zara ruKH se jo sarki

kya raat Dhale raat wo Dhalne nahin dete

kis darja hain be-dard tere hijr ke sadme

dil ko teri yaadon se bahalne nahin dete

dekha hai jise bhi wo giraate hain nazar se

chahe bhi sambhalna to sambhalne nahin dete

gulshan pe udasi ki faza dekh raha hun

wo dard ke mausam ko badalne nahin dete

be-rah na kyunkar hon bhala rahraw-e-manzil

jab rah-numa rah pe chalne nahin dete

wo samne hote hain to hota hai ye aalam

arman machalte hain machalne nahin dete