pas-e-murdan irada dil mein tha jo ku-e-qatil ka

pas-e-murdan irāda dil meñ thā jo kū-e-qātil kā

lahad meñ ḳhush huā maiñ naam sun kar pahlī manzil kā

gubār-e-dahshate-e-majnūñ ko yahī lailā se mohabbat thī

bagūlā jo uThā us ne na chhoḌā saath mahmil kā

zamīn-e-'ishq meñ ham dānā-hā-e-ashk bote haiñ

ba-juz lā-hāsilī ḳhirman nahīñ kuchh apne hāsil kā

chhuḌāyā ek hī talvār meñ zindān-e-hastī se

dahān-e-zaḳhm se vājib hai mujh ko shukr qātil kā

'azīz us se na kījai gar vo māñge jān-e-shīrīñ bhī

javāb-e-talḳh se dil toḌiye hargiz na saa.el kā

tanazzul kā sabab hai ye kamāl-e-husn hai terā

ki lāzim aa paḌā hai roz ghaTnā māh-e-kāmil kā

nahīñ hotā hai kār-e-basta vā apnoñ se duniyā meñ

kahāñ nāḳhun ne uqda aaj tak kholā anāmil kā

jise ḳhurshīd-e-mahshar zāhidān-e-ḳhushk kahte haiñ

sipand-e-sokHta hai sho.ala ruḳhsāroñ kī mahfil kā

pas-e-murdan yaqīñ hai us se bhī bū-e-vafā aa.e

koī 'attār-e-‘ġhāfil’ ’itr khīñche gar mirī gil kā

pas-e-murdan irada dil mein tha jo ku-e-qatil ka

lahad mein KHush hua main nam sun kar pahli manzil ka

gubar-e-dahshate-e-majnun ko yahi laila se mohabbat thi

bagula jo uTha us ne na chhoDa sath mahmil ka

zamin-e-'ishq mein hum dana-ha-e-ashk bote hain

ba-juz la-hasili KHirman nahin kuchh apne hasil ka

chhuDaya ek hi talwar mein zindan-e-hasti se

dahan-e-zaKHm se wajib hai mujh ko shukr qatil ka

'aziz us se na kijai gar wo mange jaan-e-shirin bhi

jawab-e-talKH se dil toDiye hargiz na sael ka

tanazzul ka sabab hai ye kamal-e-husn hai tera

ki lazim aa paDa hai roz ghaTna mah-e-kaamil ka

nahin hota hai kar-e-basta wa apnon se duniya mein

kahan naKHun ne uqda aaj tak khola anamil ka

jise KHurshid-e-mahshar zahidan-e-KHushk kahte hain

sipand-e-sokHta hai shoala ruKHsaron ki mahfil ka

pas-e-murdan yaqin hai us se bhi bu-e-wafa aae

koi 'attar-e-‘ghafil’ ’itr khinche gar meri gil ka