ghar ghar tajalliyan hain talabgar bhi to ho

ghar ghar tajalliyāñ haiñ talabgār bhī to ho

muusā sā koī tālib-e-dīdār bhī to ho

dil dard-nāk chāhiye lākhoñ haiñ ḳhūb-rū

iisā haiñ saikḌoñ koī bīmār bhī to ho

gar ham nahīñ to raunaq-e-bāzār-e-ishq kyā

ai husn-e-ḳhud-farosh ḳharīdār bhī to ho

parde meñ chāhtā hai ki hañgāma ho bapā

ai āftāb-e-hashr numūdār bhī to ho

itnī udaas sohbat-e-mai vaah mai-kasho

dast-e-subū meñ shaiḳh kī dastār bhī to ho

zāhid umīd-e-rahmat-e-haq aur hajv-e-mai

pahle sharāb pī ke gunahgār bhī to ho

so.uuñ maiñ aa ke dhuup se pāūñ amaañ magar

raazī tumhārā sāya-e-dīvār bhī to ho

saaqī udaas kyuuñ na ho bazm-e-mai-o-subū

mai-ḳhāna meñ 'amīr' sā mai-ḳhvār bhī to ho

ghar ghar tajalliyan hain talabgar bhi to ho

musa sa koi talib-e-didar bhi to ho

dil dard-nak chahiye lakhon hain KHub-ru

isa hain saikDon koi bimar bhi to ho

gar hum nahin to raunaq-e-bazar-e-ishq kya

ai husn-e-KHud-farosh KHaridar bhi to ho

parde mein chahta hai ki hangama ho bapa

ai aaftab-e-hashr numudar bhi to ho

itni udas sohbat-e-mai wah mai-kasho

dast-e-subu mein shaiKH ki dastar bhi to ho

zahid umid-e-rahmat-e-haq aur hajw-e-mai

pahle sharab pi ke gunahgar bhi to ho

soun main aa ke dhup se paun aman magar

raazi tumhaara saya-e-diwar bhi to ho

saqi udas kyun na ho bazm-e-mai-o-subu

mai-KHana mein 'amir' sa mai-KHwar bhi to ho