ghaTega tere kuche mein waqar aahista aahista

ghaTegā tere kūche meñ vaqār āhista āhista

baḌhegā āshiqī kā e'tibār āhista āhista

bahut nādim hue āḳhir vo mere qatl-e-nāhaq par

huī qadr-e-vafā jab āshkār āhista āhista

jilā.e shauq se ā.īna-e-tasvīr-e-ḳhātir meñ

numāyāñ ho chalā rū-e-nigār āhista āhista

mohabbat kī jo phailī hai ye nik.hat bāġh-e-ālam meñ

huī hai muntashir ḳhushbu-e-yār āhista āhista

milā kar ḳhaak meñ mujh ko jhukī hai sharm se lekin

uThegī phir va chashm-e-fitna-kār āhista āhista

dil-o-jān-o-jigar sabr-o-ḳhirad jo kuchh hai paas apne

ye sab kar deñge ham un par nisār āhista āhista

ajab kuchh haal ho jaatā hai apnā be-qarārī se

bajāte haiñ kabhī jab vo sitār āhista āhista

asar kuchh kuchh rahegā vasl meñ bhī rañj-e-furqat kā

dil-e-muztar ko aa.egā qarār āhista āhista

na ā.eñge vo 'hasrat' intizār-e-shauq meñ yūñ-hīñ

guzar jā.eñge ayyām-e-bahār āhista āhista

ghaTega tere kuche mein waqar aahista aahista

baDhega aashiqi ka e'tibar aahista aahista

bahut nadim hue aaKHir wo mere qatl-e-nahaq par

hui qadr-e-wafa jab aashkar aahista aahista

jilae shauq se aaina-e-taswir-e-KHatir mein

numayan ho chala ru-e-nigar aahista aahista

mohabbat ki jo phaili hai ye nikhat bagh-e-alam mein

hui hai muntashir KHushbu-e-yar aahista aahista

mila kar KHak mein mujh ko jhuki hai sharm se lekin

uThegi phir wa chashm-e-fitna-kar aahista aahista

dil-o-jaan-o-jigar sabr-o-KHirad jo kuchh hai pas apne

ye sab kar denge hum un par nisar aahista aahista

ajab kuchh haal ho jata hai apna be-qarari se

bajate hain kabhi jab wo sitar aahista aahista

asar kuchh kuchh rahega wasl mein bhi ranj-e-furqat ka

dil-e-muztar ko aaega qarar aahista aahista

na aaenge wo 'hasrat' intizar-e-shauq mein yun-hin

guzar jaenge ayyam-e-bahaar aahista aahista