main hun sirr-e-haqiqat la-makan hai KHas ghar mera

maiñ huuñ sirr-e-haqīqat lā-makāñ hai ḳhaas ghar merā

magar hai ishq meñ is vaqt pherā dar-badar merā

do-'ālam huuñ do-'ālam meñ huuñ do-'ālam pe chhāyā huuñ

maiñ har jā huuñ har ik sūrat har ik jā hai guzar merā

mire ijmāl kī tafsīl hai sab donoñ 'ālam meñ

kahīñ sūraj mirā jalva kahīñ naqsha qamar merā

tamāsha huuñ tamāshe meñ huuñ aur ḳhud huuñ tamāshā-gar

maiñ ḳhud hī dañg rahtā huuñ tamāsha dekh kar merā

haqīqat meñ haqīqat merī kyā hai ik haqīqat hai

udhar be-chūnī hai naqsha hai bā-chūnī idhar merā

maiñ lafz-e-kun huuñ aur phir lafz-e-kun kī ḳhud haqīqat huuñ

maiñ saut-e-sarmadī huuñ shor hai āThoñ pahar merā

koī aagah nahīñ asrār se mere haqīqat meñ

jo dekhī shakl-o-sūrat naam rakhā hai bashar merā

haqāyaq meñ nahīñ bāteñ mirī taqlīd kī rū se

muhaqqiq huuñ haqīqat ke bayāñ meñ hai hunar merā

jise chashm-e-ḳhudā-bīñ ho haqīqat ko mirī dekhe

musāhib huuñ ḳhudā kā ġhulġhula hai auj par merā

mohammad huuñ kahīñ shakl-e-'arab meñ 'ain-e-rab ho kar

kahīñ tafsīl meñ hai haal phir shakl-e-digar merā

nahīñ huuñ maiñ nahīñ huuñ kuchh nahīñ mujh meñ nahīñ huuñ maiñ

jo kuchh hai bas vahī hai naam hai 'ġhausī' magar merā

main hun sirr-e-haqiqat la-makan hai KHas ghar mera

magar hai ishq mein is waqt phera dar-badar mera

do-'alam hun do-'alam mein hun do-'alam pe chhaya hun

main har ja hun har ek surat har ek ja hai guzar mera

mere ijmal ki tafsil hai sab donon 'alam mein

kahin suraj mera jalwa kahin naqsha qamar mera

tamasha hun tamashe mein hun aur KHud hun tamasha-gar

main KHud hi dang rahta hun tamasha dekh kar mera

haqiqat mein haqiqat meri kya hai ek haqiqat hai

udhar be-chuni hai naqsha hai ba-chuni idhar mera

main lafz-e-kun hun aur phir lafz-e-kun ki KHud haqiqat hun

main saut-e-sarmadi hun shor hai aaThon pahar mera

koi aagah nahin asrar se mere haqiqat mein

jo dekhi shakl-o-surat nam rakha hai bashar mera

haqayaq mein nahin baaten meri taqlid ki ru se

muhaqqiq hun haqiqat ke bayan mein hai hunar mera

jise chashm-e-KHuda-bin ho haqiqat ko meri dekhe

musahib hun KHuda ka ghulghula hai auj par mera

mohammad hun kahin shakl-e-'arab mein 'ain-e-rab ho kar

kahin tafsil mein hai haal phir shakl-e-digar mera

nahin hun main nahin hun kuchh nahin mujh mein nahin hun main

jo kuchh hai bas wahi hai nam hai 'ghausi' magar mera