meri hasti ka mujhe wahm tha koi parda uske siwa na tha

mirī hastī kā mujhe vahm thā koī parda us ke sivā na thā

mirā yaar thā mere saath go maiñ ḳhudā na thā vo judā na thā

mirī yaar hī se ye buud thī mujhe yaar hī se namūd thī

vahī jalva-gar thā vajūd meñ kisī dūsre kā pata na thā

maiñ ġharīq-e-bahr-e-vajūd thā mujhe us se is kā shuhūd thā

magar apnī hastī ke vahm se maiñ judā thā us se milā na thā

mujhe khoyā mirī ḳhudī ne ḳhud mujhe maarā mire hī vahm ne

vo chhupā huā thā mujhī meñ hī magar is tarah ke chhupā na thā

maiñ unhī kī āñkhoñ meñ rahtā thā mirī āñkhoñ meñ vo samā.e the

nahīñ vo vahī un meñ samā.e the kahūñ kyā ke kyā thā maiñ kyā na thā

mirā tan nahīñ mirā dil hai ye mirā dil nahīñ mirī jaañ hai ye

mirī jaañ nahīñ koī aur hai mujhe us kā raaz khulā na thā

kahā maiñ ne paas hī rah ke tum rahe duur itnā to yuuñ kahā

tū mirā hai ab to tirā huuñ maiñ tū mirā na thā maiñ tirā na thā

maiñ thā apne banñe se pahle vaañ ke na pahuñche aql-o-gumāñ jahāñ

thā kisī ke ilm meñ maiñ magar ye thā rahnā goyā ke thā na thā

maiñ vahī huuñ 'ġhausī'-e-be-nishāñ ki vo bā-nishāñ hai mirā nishāñ

vo milā to ḳhud kā pata chalā mirā mujh ko ḳhud hī pata na thā

meri hasti ka mujhe wahm tha koi parda us ke siwa na tha

mera yar tha mere sath go main KHuda na tha wo juda na tha

meri yar hi se ye bud thi mujhe yar hi se namud thi

wahi jalwa-gar tha wajud mein kisi dusre ka pata na tha

main ghariq-e-bahr-e-wajud tha mujhe us se is ka shuhud tha

magar apni hasti ke wahm se main juda tha us se mila na tha

mujhe khoya meri KHudi ne KHud mujhe mara mere hi wahm ne

wo chhupa hua tha mujhi mein hi magar is tarah ke chhupa na tha

main unhi ki aankhon mein rahta tha meri aankhon mein wo samae the

nahin wo wahi un mein samae the kahun kya ke kya tha main kya na tha

mera tan nahin mera dil hai ye mera dil nahin meri jaan hai ye

meri jaan nahin koi aur hai mujhe us ka raaz khula na tha

kaha main ne pas hi rah ke tum rahe dur itna to yun kaha

tu mera hai ab to tera hun main tu mera na tha main tera na tha

main tha apne banne se pahle wan ke na pahunche aql-o-guman jahan

tha kisi ke ilm mein main magar ye tha rahna goya ke tha na tha

main wahi hun 'ghausi'-e-be-nishan ki wo ba-nishan hai mera nishan

wo mila to KHud ka pata chala mera mujh ko KHud hi pata na tha