jaan-e-jaan dil ko hamare karte ho taraj kya

jān-e-jāñ dil ko hamāre karte ho tārāj kyā

jab dikhātā hai tumheñ jalva to kal kyā aaj kyā

dekhne vāloñ ko tere taab va.adoñ kī kahāñ

juz tumhārī diid ke haañ kaam kyā hai kaaj kyā

ye kaho kis ko nikālā paas se jab saath ho

mulk-e-itlāqī se tum ne hai kiyā iḳhrāj kyā

ek biinī ek daanī jis kā sheva ho gayā

āñkhoñ meñ phir us kī tārājī hai kyā aur raaj kyā

jab ke ham kuchh the to apnī laaj un ke haath thī

ham hī jab Thahre na kuchh to phir hamārī laaj kyā

lam-yalid Thahrā vo jab ham lam-yakun-shai.an hue

qul-hu-vallahu-ahad hai nutfa-e-amshāj kyā

shāh-e-'ġhausī' hai faqīrī bhes ab ham ko pasand

bas hameñ farsh-e-zamīñ kaafī hai taḳht-o-tāj kyā

jaan-e-jaan dil ko hamare karte ho taraj kya

jab dikhata hai tumhein jalwa to kal kya aaj kya

dekhne walon ko tere tab wadon ki kahan

juz tumhaari did ke han kaam kya hai kaj kya

ye kaho kis ko nikala pas se jab sath ho

mulk-e-itlaqi se tum ne hai kiya iKHraj kya

ek bini ek dani jis ka shewa ho gaya

aankhon mein phir us ki taraji hai kya aur raj kya

jab ke hum kuchh the to apni laj un ke hath thi

hum hi jab Thahre na kuchh to phir hamari laj kya

lam-yalid Thahra wo jab hum lam-yakun-shaian hue

qul-hu-wallahu-ahad hai nutfa-e-amshaj kya

shah-e-'ghausi' hai faqiri bhes ab hum ko pasand

bas hamein farsh-e-zamin kafi hai taKHt-o-taj kya