nazar mein bas gai jab se wo shakl-e-jaan-e-jaan apni

nazar meñ bas ga.ī jab se vo shakl-e-jān-e-jāñ apnī

nazar aatī hai hastī saaf ye vahm-o-gumāñ apnī

jahāñ sab DhūñDte haiñ ham nahīñ paate haiñ apne ko

ḳhudā jaane ke hastī chhup ga.ī jā kar kahāñ apnī

vo bā-nām-o-nishāñ bā-vasf benām-o-nishāñ ke haiñ

haqīqat meñ to niklī zaat benām-o-nishāñ apnī

chhupe jitnā ham utnī uñgliyāñ uTThīñ taraf apnī

tamāsha dekhiye ghar ghar hai ab to dāstāñ apnī

har ik unvān se har ek lab par zikr hai apnā

ajab ye bā.is-e-shohrat huiiñ gum-nāmiyāñ apnī

ḳhalīfa ḳhalq ke ham ham hī masjūd-e-malak Thahre

be-hamdillāh sanā dekho yahāñ apnī vahāñ apnī

dil-e-majnūñ meñ hai lailā batātā hai vo mahmil ko

vo kyā jaane jo bhūle raah ḳhud hī kārvāñ apnī

jise ham DhūñDne nikle the āḳhir ham meñ vo nikle

baḌī muddat meñ āḳhir hal huī ye chīstāñ apnī

ham apne aap ko kyā kho.e 'ġhausī' ham hī haath aa.e

nazar aa.ī vahī sūrat ayaañ apnī nihāñ apnī

nazar mein bas gai jab se wo shakl-e-jaan-e-jaan apni

nazar aati hai hasti saf ye wahm-o-guman apni

jahan sab DhunDte hain hum nahin pate hain apne ko

KHuda jaane ke hasti chhup gai ja kar kahan apni

wo ba-nam-o-nishan ba-wasf benam-o-nishan ke hain

haqiqat mein to nikli zat benam-o-nishan apni

chhupe jitna hum utni ungliyan uTThin taraf apni

tamasha dekhiye ghar ghar hai ab to dastan apni

har ek unwan se har ek lab par zikr hai apna

ajab ye bais-e-shohrat huin gum-namiyan apni

KHalifa KHalq ke hum hum hi masjud-e-malak Thahre

be-hamdillah sana dekho yahan apni wahan apni

dil-e-majnun mein hai laila batata hai wo mahmil ko

wo kya jaane jo bhule rah KHud hi karwan apni

jise hum DhunDne nikle the aaKHir hum mein wo nikle

baDi muddat mein aaKHir hal hui ye chistan apni

hum apne aap ko kya khoe 'ghausi' hum hi hath aae

nazar aai wahi surat ayan apni nihan apni