ghere hue kashti ko hai tufan bhi bhanwar bhi

ghere hue kashtī ko hai tūfāñ bhī bhañvar bhī

hāsil hai mujhe ghar bhī yahāñ lutf-e-safar bhī

jin āñkhoñ se dekhā thā idhar dekh udhar bhī

kyā chiiz hai zālim tirī duzdīda-nazar bhī

itnā hai adab āmad-e-gul-rū kā chaman meñ

ḳhāmosh haiñ baiThe hue murġhān-e-sahar bhī

bedār vo ho jaate the ġhunchoñ kī chaTak se

ab un ko jagātā nahīñ chillā ke gajar bhī

ma.amūr tasavvur se ye hai ḳhāna-e-dil aaj

is shīshe meñ tasvīr idhar bhī hai udhar bhī

laḳht-e-jigaro ashk nahīñ muue mizha par

dekho shajar-e-ḳhushk meñ gul bhī hai samar bhī

ḳhūn-e-shohadā rañg magar lā.egā ik rose

aafat koī aa jā.egī shamshīr ke sar bhī

kī mahfil-e-aġhyār meñ jhuk kar use taslīm

hañs kar kahā zinda hai abhī tū kahīñ mar bhī

lo aur suno sher mire sun ke vo bolā

aatā hai ba-juz is ke koī aur hunar bhī

kis tarh na pahlū meñ raqīboñ ko jagah de

āġhosh meñ har sañg ke hotā hai sharar bhī

tum qabr par aa.e ho mirī phuul chaḌhāne

mujh par hai girāñ sāya-e-barg-e-gul-e-tar bhī

shīshe kī tarah saaf hai itnā tan-e-nāzuk

aatā hai latāfat se nazar aks-e-nazar bhī

parvāne gire paḌte the is bazm meñ lākhoñ

sar dhuntī thī hasrat se khaḌī sham-e-sahar bhī

muTThī meñ hai dil un kī sun lo phir ye DhīThā.ī

vallāh jo ho mire farishtoñ ko ḳhabar bhī

kis shaan se vo aa.e the gul-gasht-e-chaman ko

ik raqs ke aalam meñ the murġhān-e-sahar bhī

tū vo gul-e-ra.anā hai jo aa jaa.e chaman meñ

jhūmā kareñ ik vajd ke aalam meñ shajar bhī

ārām kisī ko bhī nahīñ bahr-e-jahāñ meñ

gardish meñ jo hai mauj to chakkar meñ bhañvar bhī

thā ba.ad-e-fanā bhī ye ġhazab zo.af kā aalam

pahūñchī na vahāñ tak mire marne kī ḳhabar bhī

manzil thī adam kī ḳhas-o-ḳhāshāk se ye paak

dāman pe na rahrav ke paḌī gard-e-safar bhī

me.arāj mirī ḳhaak ne paa.ī ye havā se

qāsir hai pahuñchne se vahāñ paik-e-ḳhabar bhī

manzil adam ābād kī āsān hai utnī

raftār kī hotī nahīñ rahrav ko ḳhabar bhī

haibat hai abhī tak ye hamārī shab-e-ġham kī

kāfūr huā jaatā hai kāfūr-e-sahar bhī

ye ro.ab hai chhāyā huā shām-e-shab-e-ġham kā

detā nahīñ āvāz bajāne se gajar bhī

ahbāb mire ġhusl-o-kafan se hue fāriġh

lo ab to muhayyā hue sāmān-e-safar bhī

ghabrā ke kaho kyā kareñ ab kunj-e-lahad meñ

ham ko to yahīñ shaam bhī karnī hai sahr bhī

ai 'arsh' vo dam-ḳham vo kahāñ josh hai baaqī

ik maut hai 'taslīm' ke marne kī ḳhabar bhī

manzil adam ābād kī dushvār hai ai 'arsh'

lāzim hai musāfir ke liye zād-e-safar bhī

ghere hue kashti ko hai tufan bhi bhanwar bhi

hasil hai mujhe ghar bhi yahan lutf-e-safar bhi

jin aankhon se dekha tha idhar dekh udhar bhi

kya chiz hai zalim teri duzdida-nazar bhi

itna hai adab aamad-e-gul-ru ka chaman mein

KHamosh hain baiThe hue murghan-e-sahar bhi

bedar wo ho jate the ghunchon ki chaTak se

ab un ko jagata nahin chilla ke gajar bhi

mamur tasawwur se ye hai KHana-e-dil aaj

is shishe mein taswir idhar bhi hai udhar bhi

laKHt-e-jigaro ashk nahin mue mizha par

dekho shajar-e-KHushk mein gul bhi hai samar bhi

KHun-e-shohada rang magar laega ek rose

aafat koi aa jaegi shamshir ke sar bhi

ki mahfil-e-aghyar mein jhuk kar use taslim

hans kar kaha zinda hai abhi tu kahin mar bhi

lo aur suno sher mere sun ke wo bola

aata hai ba-juz is ke koi aur hunar bhi

kis tarh na pahlu mein raqibon ko jagah de

aaghosh mein har sang ke hota hai sharar bhi

tum qabr par aae ho meri phul chaDhane

mujh par hai giran saya-e-barg-e-gul-e-tar bhi

shishe ki tarah saf hai itna tan-e-nazuk

aata hai latafat se nazar aks-e-nazar bhi

parwane gire paDte the is bazm mein lakhon

sar dhunti thi hasrat se khaDi sham-e-sahar bhi

muTThi mein hai dil un ki sun lo phir ye DhiThai

wallah jo ho mere farishton ko KHabar bhi

kis shan se wo aae the gul-gasht-e-chaman ko

ek raqs ke aalam mein the murghan-e-sahar bhi

tu wo gul-e-rana hai jo aa jae chaman mein

jhuma karen ek wajd ke aalam mein shajar bhi

aaram kisi ko bhi nahin bahr-e-jahan mein

gardish mein jo hai mauj to chakkar mein bhanwar bhi

tha baad-e-fana bhi ye ghazab zoaf ka aalam

pahunchi na wahan tak mere marne ki KHabar bhi

manzil thi adam ki KHas-o-KHashak se ye pak

daman pe na rahraw ke paDi gard-e-safar bhi

mearaj meri KHak ne pai ye hawa se

qasir hai pahunchne se wahan paik-e-KHabar bhi

manzil adam aabaad ki aasan hai utni

raftar ki hoti nahin rahraw ko KHabar bhi

haibat hai abhi tak ye hamari shab-e-gham ki

kafur hua jata hai kafur-e-sahar bhi

ye roab hai chhaya hua sham-e-shab-e-gham ka

deta nahin aawaz bajaane se gajar bhi

ahbab mere ghusl-o-kafan se hue farigh

lo ab to muhayya hue saman-e-safar bhi

ghabra ke kaho kya karen ab kunj-e-lahad mein

hum ko to yahin sham bhi karni hai sahr bhi

ai 'arsh' wo dam-KHam wo kahan josh hai baqi

ek maut hai 'taslim' ke marne ki KHabar bhi

manzil adam aabaad ki dushwar hai ai 'arsh'

lazim hai musafir ke liye zad-e-safar bhi