maine jo aaine mein apna tajalla dekha

maiñ ne jo ā.īne meñ apnā tajallā dekhā

jab kuchh ā.īne kī hairat kā tamāsha dekhā

mujh se chhuptā hai tu kyā haañ tujhe dekhā dekhā

tū ne jis shakl se jalva kiyā vaisā dekhā

raat din safha-e-hastī kā miTātā huuñ naqsh

jab se ālam-e-fānī kā tamāsha dekhā

mahv aisā huuñ ki mujh ko nahīñ ḳhud apnī ḳhabar

kyā ye kānoñ ne sunā āñkhoñ ne kyā kyā dekhā

ham se nazroñ meñ vo kahte haiñ ki ham tum ik haiñ

dekhā dekhā mirī jaañ baat kā pardā dekhā

mujh ko saaqī ne pilāyā hai vo sāġhar 'ġhausī'

jis taraf aañkh uThī yaar kā jalvā dekhā

main ne jo aaine mein apna tajalla dekha

jab kuchh aaine ki hairat ka tamasha dekha

mujh se chhupta hai tu kya han tujhe dekha dekha

tu ne jis shakl se jalwa kiya waisa dekha

raat din safha-e-hasti ka miTata hun naqsh

jab se aalam-e-fani ka tamasha dekha

mahw aisa hun ki mujh ko nahin KHud apni KHabar

kya ye kanon ne suna aankhon ne kya kya dekha

hum se nazron mein wo kahte hain ki hum tum ek hain

dekha dekha meri jaan baat ka parda dekha

mujh ko saqi ne pilaya hai wo saghar 'ghausi'

jis taraf aankh uThi yar ka jalwa dekha