fuzun hota hai ya kam-iztirab-e-dil KHuda jaane

fuzūñ hotā hai yā kam-iztirāb-e-dil ḳhudā jaane

nigāheñ haal par rahtī haiñ mustaqbil ḳhudā jaane

abhī se uTh rahī haiñ har taraf kashtī-shikan maujeñ

havādis pesh kyā aate haiñ tā-sāhil ḳhudā jaane

adā.eñ shoḳhiyāñ husn-e-tabassum jumbish-e-abrū

pa.e ushshāq in meñ kaun hai qātil ḳhudā jaane

abhī to vādī-e-vahshat meñ hai pahlā qadam apnā

bayābāñ kitne haiñ tā-āḳhir-e-manzil ḳhudā jaane

isī ummīd par baiThe haiñ kab se un kī mahfil meñ

nigāh-e-multafit kab hogī sū-e-dil ḳhudā jaane

ba-josh-e-jazb-e-dil ham chal paḌe haiñ rāh-e-ulfat meñ

kahāñ hotī hai apnī āḳhirī manzil ḳhudā jaane

'ġhubār'-e-ḳhasta hai āvārgī kā silsila ab tak

hamārī bhī muayyan hai kui manzil ḳhudā jaane

fuzun hota hai ya kam-iztirab-e-dil KHuda jaane

nigahen haal par rahti hain mustaqbil KHuda jaane

abhi se uTh rahi hain har taraf kashti-shikan maujen

hawadis pesh kya aate hain ta-sahil KHuda jaane

adaen shoKHiyan husn-e-tabassum jumbish-e-abru

pae ushshaq in mein kaun hai qatil KHuda jaane

abhi to wadi-e-wahshat mein hai pahla qadam apna

bayaban kitne hain ta-aKHir-e-manzil KHuda jaane

isi ummid par baiThe hain kab se un ki mahfil mein

nigah-e-multafit kab hogi su-e-dil KHuda jaane

ba-josh-e-jazb-e-dil hum chal paDe hain rah-e-ulfat mein

kahan hoti hai apni aaKHiri manzil KHuda jaane

'ghubar'-e-KHasta hai aawargi ka silsila ab tak

hamari bhi muayyan hai kui manzil KHuda jaane