ek pari-chehra ne diwana banaya hai mujhe

ik parī-chehra ne dīvāna banāyā hai mujhe

kuchh 'ajab hosh-rubā jalva dikhāyā hai mujhe

sar-e-bāzār-e-vujūd aap se aayā nahīñ meñ

jalva dikhlāne ko apnā koī laayā hai mujhe

shukr sad-shukr ki bāzīcha-e-mā'shūq huā

gah bigāḌā hai mujhe gaah banāyā hai mujhe

'ishq meñ us ruḳh-e-ḳhandāñ kā hañsī samjhā thā

so isī vāste yuuñ un ne rulāyā hai mujhe

auj-e-daulat se sū-e-pastī-e-faqr aayā huuñ

charḳh ne aah bulandī se girāyā hai mujhe

varaq āb-zada-sā hai mirā nuskHa-e-'umar

safha-e-hastī se juuñ harf miTāyā hai mujhe

mahv aisā huuñ ki samjhā nahīñ jaatā kyā huuñ

kasrat-e-hādisa ne bas-ki miTāyā hai mujhe

garche zāhir meñ salāmat huuñ pe huuñ raakh kā Dher

ātish-e-'ishq ne parda meñ jalāyā hai mujhe

kHūbī-e-farsh samau-rād tirī hai jī se 'rāsiḳh'

ḳhaak par baiThnā jab se ki ḳhush aayā hai mujhe

ek pari-chehra ne diwana banaya hai mujhe

kuchh 'ajab hosh-ruba jalwa dikhaya hai mujhe

sar-e-bazar-e-wujud aap se aaya nahin mein

jalwa dikhlane ko apna koi laya hai mujhe

shukr sad-shukr ki bazicha-e-ma'shuq hua

gah bigaDa hai mujhe gah banaya hai mujhe

'ishq mein us ruKH-e-KHandan ka hansi samjha tha

so isi waste yun un ne rulaya hai mujhe

auj-e-daulat se su-e-pasti-e-faqr aaya hun

charKH ne aah bulandi se giraya hai mujhe

waraq aab-zada-sa hai mera nuskHa-e-'umar

safha-e-hasti se jun harf miTaya hai mujhe

mahw aisa hun ki samjha nahin jata kya hun

kasrat-e-hadisa ne bas-ki miTaya hai mujhe

garche zahir mein salamat hun pe hun rakh ka Dher

aatish-e-'ishq ne parda mein jalaya hai mujhe

kHubi-e-farsh samau-rad teri hai ji se 'rasiKH'

KHak par baiThna jab se ki KHush aaya hai mujhe