اک پری چہرہ نے دیوانہ بنایا ہے مجھے

اک پری چہرہ نے دیوانہ بنایا ہے مجھے

کچھ عجب ہوش ربا جلوہ دکھایا ہے مجھے

سر بازار وجود آپ سے آیا نہیں میں

جلوہ دکھلانے کو اپنا کوئی لایا ہے مجھے

شکر صد شکر کہ بازیچۂ معشوق ہوا

گہ بگاڑا ہے مجھے گاہ بنایا ہے مجھے

عشق میں اس رخ خنداں کا ہنسی سمجھا تھا

سو اسی واسطے یوں ان نے رلایا ہے مجھے

اوج دولت سے سوئے پستئ فقر آیا ہوں

چرخ نے آہ بلندی سے گرایا ہے مجھے

ورق آب زدہ سا ہے مرا نسخۂ عمر

صفحۂ ہستی سے جوں حرف مٹایا ہے مجھے

محو ایسا ہوں کہ سمجھا نہیں جاتا کیا ہوں

کثرت حادثہ نے بسکہ مٹایا ہے مجھے

گرچہ ظاہر میں سلامت ہوں پہ ہوں راکھ کا ڈھیر

آتش عشق نے پردہ میں جلایا ہے مجھے

خوبئ فرش سمو راد تری ہے جی سے راسخؔ

خاک پر بیٹھنا جب سے کہ خوش آیا ہے مجھے