duaen mangin hain muddaton tak jhuka ke sar hath uTha-uTha kar

duā.eñ māñgīñ haiñ muddatoñ tak jhukā ke sar haath uThā-uThā kar

huā huuñ tab maiñ butoñ kā banda ḳhudā-ḳhudā kar ḳhudā-ḳhudā kar

dikhāyā vahdat ne apnā jalva-duī kā parda uThā-uThā kar

karūñ maiñ sajda butoñ ke aage tū ai barahman ḳhudā-ḳhudā kar

kahāñ vo shakleñ kahāñ vo bāteñ kahāñ vo jalse kahāñ vo mahfil

ye sab kā sab ḳhvāb kā thā sāmāñ chhipā liyā bas dikhā-dikhā kar

jo pahuñcheñ ham murġh-e-nāma-bar ko to chuTkiyoñ meñ use uḌā de

agarche vo tifl kheltā hai par kabūtar uḌā-uḌā kar

kabhī mire dil se kartī haiñ bal kabhī haiñ shāne se vo ulajhtī

ġharaz ki zulfoñ ko tū ne zālim bigāḌā hai sar chaḌhā-chaḌhā kar

dikhā ke gul se ’ezār tū ne kiyā dil-e-’āshiqāñ ko bulbul

banā diye gosh-e-ġhairat-e-gul sadā-e-rañgīñ sunā-sunā kar

gunāh karatā hai barmalā tū kisī se karatā nahīñ hayā tū

ḳhudā ko kyā muñh dikhā.egā tū zarā tū ai be-hayā hayā kar

kiyā hai poshīda 'ishq ham ne kisī se dar-parda hai mohabbat

paḌe hue bistar-e-alam par jo rote haiñ muñh chupā-chupā kar

tirā sā qad ban sakā na hargiz tirī sī sūrat na ban sakī phir

agarche sāne.a ne lākhoñ naqshe bigāḌ Daale banā-banā kar

kaTī hai 'goyā' shab-e-javānī ab aan pahuñchī hai sub.h-e-pīrī

bahut sī kī tū ne but-parastī ab ek-do din ḳhudā-ḳhudā kar

duaen mangin hain muddaton tak jhuka ke sar hath uTha-uTha kar

hua hun tab main buton ka banda KHuda-KHuda kar KHuda-KHuda kar

dikhaya wahdat ne apna jalwa-dui ka parda uTha-uTha kar

karun main sajda buton ke aage tu ai barahman KHuda-KHuda kar

kahan wo shaklen kahan wo baaten kahan wo jalse kahan wo mahfil

ye sab ka sab KHwab ka tha saman chhipa liya bas dikha-dikha kar

jo pahunchen hum murgh-e-nama-bar ko to chuTkiyon mein use uDa de

agarche wo tifl khelta hai par kabutar uDa-uDa kar

kabhi mere dil se karti hain bal kabhi hain shane se wo ulajhti

gharaz ki zulfon ko tu ne zalim bigaDa hai sar chaDha-chaDha kar

dikha ke gul se ’ezar tu ne kiya dil-e-’ashiqan ko bulbul

bana diye gosh-e-ghairat-e-gul sada-e-rangin suna-suna kar

gunah karata hai barmala tu kisi se karata nahin haya tu

KHuda ko kya munh dikhaega tu zara tu ai be-haya haya kar

kiya hai poshida 'ishq hum ne kisi se dar-parda hai mohabbat

paDe hue bistar-e-alam par jo rote hain munh chupa-chupa kar

tera sa qad ban saka na hargiz teri si surat na ban saki phir

agarche sanea ne lakhon naqshe bigaD Dale bana-bana kar

kaTi hai 'goya' shab-e-jawani ab aan pahunchi hai subh-e-piri

bahut si ki tu ne but-parasti ab ek-do din KHuda-KHuda kar