دعائیں مانگیں ہیں مدتوں تک جھکا کے سر ہاتھ اٹھا اٹھا کر

دعائیں مانگیں ہیں مدتوں تک جھکا کے سر ہاتھ اٹھا اٹھا کر

ہوا ہوں تب میں بتوں کا بندہ خدا خدا کر خدا خدا کر

دکھایا وحدت نے اپنا جلوہ دوئی کا پردہ اٹھا اٹھا کر

کروں میں سجدہ بتوں کے آگے تو اے برہمن خدا خدا کر

کہاں وہ شکلیں کہاں وہ باتیں کہاں وہ جلسے کہاں وہ محفل

یہ سب کا سب خواب کا تھا ساماں چھپا لیا بس دکھا دکھا کر

جو پہنچیں ہم مرغ نامہ بر کو تو چٹکیوں میں اسے اڑا دے

اگرچہ وہ طفل کھیلتا ہے پر کبوتر اڑا اڑا کر

کبھی مرے دل سے کرتی ہیں بل کبھی ہیں شانے سے وہ الجھتی

غرض کہ زلفوں کو تو نے ظالم بگاڑا ہے سر چڑھا چڑھا کر

دکھا کے گل سے عذار تو نے کیا دل عاشقاں کو بلبل

بنا دیے گوش غیرت گل صدائے رنگیں سنا سنا کر

گناہ کرتا ہے برملا تو کسی سے کرتا نہیں حیا تو

خدا کو کیا منہ دکھائے گا تو ذرا تو اے بے حیا حیا کر

کیا ہے پوشیدہ عشق ہم نے کسی سے در پردہ ہے محبت

پڑے ہوئے بستر الم پر جو روتے ہیں منہ چھپا چھپا کر

ترا سا قد بن سکا نہ ہرگز تری سی صورت نہ بن سکی پھر

اگرچہ صانع نے لاکھوں نقشے بگاڑ ڈالے بنا بنا کر

کٹی ہے گویاؔ شب جوانی اب آن پہنچی ہے صبح پیری

بہت سی کی تو نے بت پرستی اب ایک دو دن خدا خدا کر