dikha kar mujhko chashm-e-mast mastana bana Dala

dikhā kar mujh ko chashm-e-mast mastāna banā Daalā

pilā kar aaj saaqī tū ne dīvāna banā Daalā

qiyām-e-yād ḳhūbāñ ko taraqqī de ḳhudā us ne

mire ujḌe hue dil ko parī-ḳhāna banā Daalā

dil sad chaak merā thā bhalā kis kaam ke qābil

magar ik shoḳh ne le kar use shānā banā Daalā

zarar pahuñchā na mai-ḳhāne ko kuchh sañg-e-havādis se

agar TuuTī koī botal to paimāna banā Daalā

ġhazab jaadū bharī hotī haiñ āñkheñ husn vāloñ kī

nazar jis se milā.ī us ko dīvāna banā Daalā

tamannā vasl kī dil se jo niklī ye ḳhayāl aayā

ki ik ābād ghar ko haaye vīrāna banā Daalā

vo mai-kash huuñ ki har dam shīsha-o-sāġhar hai saath apne

jahāñ baiThā vahīñ par ek mai-ḳhāna banā Daalā

kHayāl-e-bada-noshī furqat-e-sāqī meñ jab aayā

banāyā dil ko ḳhum āñkhoñ ko paimāna banā Daalā

ḳhudā ke fazl se āfāq thā farzāna-o-āqil

navāzish kī butoñ ne us ko dīvāna banā Daalā

dikha kar mujh ko chashm-e-mast mastana bana Dala

pila kar aaj saqi tu ne diwana bana Dala

qiyam-e-yaad KHuban ko taraqqi de KHuda us ne

mere ujDe hue dil ko pari-KHana bana Dala

dil sad chaak mera tha bhala kis kaam ke qabil

magar ek shoKH ne le kar use shana bana Dala

zarar pahuncha na mai-KHane ko kuchh sang-e-hawadis se

agar TuTi koi botal to paimana bana Dala

ghazab jadu bhari hoti hain aankhen husn walon ki

nazar jis se milai us ko diwana bana Dala

tamanna wasl ki dil se jo nikli ye KHayal aaya

ki ek aabaad ghar ko haye virana bana Dala

wo mai-kash hun ki har dam shisha-o-saghar hai sath apne

jahan baiTha wahin par ek mai-KHana bana Dala

kHayal-e-bada-noshi furqat-e-saqi mein jab aaya

banaya dil ko KHum aankhon ko paimana bana Dala

KHuda ke fazl se aafaq tha farzana-o-aqil

nawazish ki buton ne us ko diwana bana Dala