gulon ki chah mein aae the Khaar le ke chale

guloñ kī chaah meñ aa.e the ḳhaar le ke chale

chaman se ham ġham-e-fasl-e-bahār le ke chale

shamīm-e-gul se mirā dil nahīñ bahaltā ab

kaho sabā se ki ḳhushbu-e-yār le ke chale

havā ke jhoñke ḳhudā jaane jā rahe haiñ kidhar

kahāñ ye mere garebāñ ke taar le ke chale

hai baat kyā jo tire mai-kade se bhī saaqī

malāl-e-tishna-labī bāda-ḳhvār le ke chale

ham un kī bazm meñ pahuñche to the tahī-dāman

chale to rahmat-e-parvardigār le ke chale

farāz arsh nazar aa rahā thā zer-e-qadam

hameñ jab ahl-e-sitam sū-e-dār le ke chale

rah-e-hayāt meñ hai kāmrāñ vahī 'kashfī'

jo apne dosh pe auroñ kā baar le ke chale

gulon ki chah mein aae the KHar le ke chale

chaman se hum gham-e-fasl-e-bahaar le ke chale

shamim-e-gul se mera dil nahin bahalta ab

kaho saba se ki KHushbu-e-yar le ke chale

hawa ke jhonke KHuda jaane ja rahe hain kidhar

kahan ye mere gareban ke tar le ke chale

hai baat kya jo tere mai-kade se bhi saqi

malal-e-tishna-labi baada-KHwar le ke chale

hum un ki bazm mein pahunche to the tahi-daman

chale to rahmat-e-parwardigar le ke chale

faraaz arsh nazar aa raha tha zer-e-qadam

hamein jab ahl-e-sitam su-e-dar le ke chale

rah-e-hayat mein hai kaamran wahi 'kashfi'

jo apne dosh pe auron ka bar le ke chale