گلوں کی چاہ میں آئے تھے خار لے کے چلے

گلوں کی چاہ میں آئے تھے خار لے کے چلے

چمن سے ہم غم فصل بہار لے کے چلے

شمیم گل سے مرا دل نہیں بہلتا اب

کہو صبا سے کہ خوشبوئے یار لے کے چلے

ہوا کے جھونکے خدا جانے جا رہے ہیں کدھر

کہاں یہ میرے گریباں کے تار لے کے چلے

ہے بات کیا جو ترے میکدے سے بھی ساقی

ملال تشنہ لبی بادہ خوار لے کے چلے

ہم ان کی بزم میں پہنچے تو تھے تہی دامن

چلے تو رحمت پروردگار لے کے چلے

فراز عرش نظر آ رہا تھا زیر قدم

ہمیں جب اہل ستم سوئے دار لے کے چلے

رہ حیات میں ہے کامراں وہی کشفیؔ

جو اپنے دوش پہ اوروں کا بار لے کے چلے