hasil-e-’ishq gham-e-dil ke siwa kuchh bhi nahin

hāsil-e-’ishq ġham-e-dil ke sivā kuchh bhī nahīñ

aur agar hai to sab un kā hai mirā kuchh bhī nahīñ

jis pe buniyād tamannā kī rakhī hai dil ne

un ke andāz-e-taḳhātub ke sivā kuchh bhī nahīñ

kar diyā mast merī jur.at-e-rindī ne mujhe

varna tere lab-e-rañgīñ kā mazā kuchh bhī nahīñ

jo ḳhudā de to baḌī chiiz hai ehsās-e-jamāl

lekin is raah meñ Thokar ke sivā kuchh bhī nahīñ

maiñ na dekhūñ to tire husn kī qīmat kyā hai

maiñ na taḌpūñ to ye andāz-e-jafā kuchh bhī nahīñ

is adā se mujhe barbād kiyā hai us ne

ki gayā kuchh bhī nahīñ aur rahā kuchh bhī nahīñ

vaqt ke saath badal jaatī hai duniyā 'maikash'

jis pe ham jiite the vo 'ahd-e-vafā kuchh bhī nahīñ

hasil-e-’ishq gham-e-dil ke siwa kuchh bhi nahin

aur agar hai to sab un ka hai mera kuchh bhi nahin

jis pe buniyaad tamanna ki rakhi hai dil ne

un ke andaz-e-taKHatub ke siwa kuchh bhi nahin

kar diya mast meri jurat-e-rindi ne mujhe

warna tere lab-e-rangin ka maza kuchh bhi nahin

jo KHuda de to baDi chiz hai ehsas-e-jamal

lekin is rah mein Thokar ke siwa kuchh bhi nahin

main na dekhun to tere husn ki qimat kya hai

main na taDpun to ye andaz-e-jafa kuchh bhi nahin

is ada se mujhe barbaad kiya hai us ne

ki gaya kuchh bhi nahin aur raha kuchh bhi nahin

waqt ke sath badal jati hai duniya 'maikash'

jis pe hum jite the wo 'ahd-e-wafa kuchh bhi nahin