hasil hai mere ashk ka hirman kahen jise

hāsil hai mere ashk kā hirmāñ kaheñ jise

saaya hai vo mirā shab-e-hijrāñ kaheñ jise

ai rashk-e-mahr jalva tirā hai nigāh-e-soz

parda tirā hai āriz-e-tābāñ kaheñ jise

mujh ko ki muddatoñ pe qafas se rihā huā

sub.h-e-vatan hai shām-e-ġharībāñ kaheñ jise

ḳhūgar huuñ mushkiloñ kā ummīd-e-visāl meñ

dushvār mujh pe hai vahī āsāñ kaheñ jise

ḳhush huuñ junūñ se ki vo karte haiñ iltifāt

hai sub.h ii.d chāk-e-garebāñ kaheñ jise

sa.ī talab meñ surma karūñ chashm-e-shauq kā

vo ik kaf-e-ġhubār bayābāñ kaheñ jise

jalva ko tere hashr kā kyuuñ intizār hai

jalva tirā hai hashr kā sāmāñ kaheñ jise

kar ġharq bahr-e-ishq ki kaafī nahii. mujhe

hammām garm dozaḳh-e-sozāñ kaheñ jise

vo ġham-sarisht huuñ ki hai ishrat-kada mirā

is se pare ki rauza-e-rizvāñ kaheñ jise

'sūfī' batā.e manzil-e-jānāñ kī raah ko

ab chup hai vo jaras dil-e-nālāñ kaheñ jise

hasil hai mere ashk ka hirman kahen jise

saya hai wo mera shab-e-hijran kahen jise

ai rashk-e-mahr jalwa tera hai nigah-e-soz

parda tera hai aariz-e-taban kahen jise

mujh ko ki muddaton pe qafas se riha hua

subh-e-watan hai sham-e-ghariban kahen jise

KHugar hun mushkilon ka ummid-e-visal mein

dushwar mujh pe hai wahi aasan kahen jise

KHush hun junun se ki wo karte hain iltifat

hai subh id chaak-e-gareban kahen jise

sai talab mein surma karun chashm-e-shauq ka

wo ek kaf-e-ghubar bayaban kahen jise

jalwa ko tere hashr ka kyun intizar hai

jalwa tera hai hashr ka saman kahen jise

kar gharq bahr-e-ishq ki kafi nahi mujhe

hammam garm dozaKH-e-sozan kahen jise

wo gham-sarisht hun ki hai ishrat-kada mera

is se pare ki rauza-e-rizwan kahen jise

'sufi' batae manzil-e-jaanan ki rah ko

ab chup hai wo jaras dil-e-nalan kahen jise