hath aa jāeñge do-chaar jahan aur tere

haath aa jā.eñge do-chār jahāñ aur tere

bas zarā vaqt se raftār ziyāda kar le

zabt kī āḳhirī had par dil-e-bismil se kahā

jaañ ba-lab hai to zarā shor-sharāba kar le

bādaloñ se tirī yaarī hai to kis baat kā Dar

ek dariyā ne jo karnā hai kināra kar le

aañkh kahtī hai ke dīdār hī kaafī hai magar

dil ye kahtā hai koī kaam anokhā kar le

kaun dekhegā mohabbat hai ye ḳhālis kitnī

duudh meñ paanī milā aur ziyāda kar le

saañp yādoñ ke jo shab-bhar mujhe Daste haiñ 'jamāl'

kaash qabze meñ unheñ koī saperā kar le

hath aa jāeñge do-chaar jahan aur tere

bas zara waqt se raftar ziyaada kar le

zabt ki aaKHiri had par dil-e-bismil se kaha

jaan ba-lab hai to zara shor-sharaba kar le

baadalon se teri yari hai to kis baat ka Dar

ek dariya ne jo karna hai kinara kar le

aankh kahti hai ke didar hi kafi hai magar

dil ye kahta hai koi kaam anokha kar le

kaun dekhega mohabbat hai ye KHalis kitni

dudh mein pani mila aur ziyaada kar le

sanp yaadon ke jo shab-bhar mujhe Daste hain 'jamal'

kash qabze mein unhen koi sapera kar le