hai muqaddar mein dar-e-yar pe sajid hona

hai muqaddar meñ dar-e-yār pe sājid honā

kyā pasand aa.e hameñ ābid-o-zāhid honā

ka.aba-e-dil jise sab kahte haiñ vo ghar hai yahī

is makāñ meñ hai zarūr aap kā vārid honā

o baḌe ghar ke makīñ ka.aba ke mālik daatā

ham faqīroñ se bhī kuchh vāhid-o-shāhid honā

jumla a.adād meñ maujūd adad ek kā hai

usī kasrat se hai sābit tirā vāhid honā

mujh ko hotā hai gumāñ shāh-e-rusul par kuchh aur

yaad aatā hai sikandar kā jo qāsid honā

ham miTe aap par ai jaan to bane aap hasīñ

ye hamīñ ne hai sikhāyā tumheñ shāhid honā

us ko mumkin hī nahīñ hai kisī sūrat se shifā

maraz-e-maut hai insān kā hāsid honā

tire kūche meñ farishtoñ ke bhī par jalte haiñ

kaam aa.egā na jibrīl kā qāsid honā

kabhī manzil pe na pahūñchā koī be shar.a faqīr

farz sālik pe hai pāband-e-a'qā.id honā

raah ko chhoḌ ke be-rāh na honā 'akbar'

saḳht dushvār muqallid ko hai mojid honā

hai muqaddar mein dar-e-yar pe sajid hona

kya pasand aae hamein aabid-o-zahid hona

kaba-e-dil jise sab kahte hain wo ghar hai yahi

is makan mein hai zarur aap ka warid hona

o baDe ghar ke makin kaba ke malik data

hum faqiron se bhi kuchh wahid-o-shahid hona

jumla aadad mein maujud adad ek ka hai

usi kasrat se hai sabit tera wahid hona

mujh ko hota hai guman shah-e-rusul par kuchh aur

yaad aata hai sikandar ka jo qasid hona

hum miTe aap par ai jaan to bane aap hasin

ye hamin ne hai sikhaya tumhein shahid hona

us ko mumkin hi nahin hai kisi surat se shifa

maraz-e-maut hai insan ka hasid hona

tere kuche mein farishton ke bhi par jalte hain

kaam aaega na jibril ka qasid hona

kabhi manzil pe na pahuncha koi be shara faqir

farz salik pe hai paband-e-a'qaid hona

rah ko chhoD ke be-rah na hona 'akbar'

saKHt dushwar muqallid ko hai mojid hona