hai taqaza-e-mohabbat na uThe sar aastan se

hai taqāza-e-mohabbat na uThe sar āstāñ se

jahāñ aql tak na pahuñche maiñ guzar gayā vahāñ se

tū hai jānashīn-e-haidar tū hai markaz-e-saḳhāvat

tu ne kis qadar navāzā mujhe lutf-e-be-karāñ se

mujhe dī hai apnī chāhat ye karam ye mehrbānī

maiñ adā-e-shukr terā karūñ kaun sī zabāñ se

vahī ḳhuub jāntā hai merā maqsad-e-tamannā

na uThā.e koī chilman mere un ke darmiyāñ se

mujhe jab se ho ga.ī hai dar-e-yār se mohabbat

mujhe dekhtī hai duniyā ab nigāh-e-bad-gumāñ se

maiñ 'nāyāb-vārsī' huuñ ki sarāpā rāz-e-ulfat

merā haal hogā zāhir kabhī marg-e-nā-gahāñ se

hai taqaza-e-mohabbat na uThe sar aastan se

jahan aql tak na pahunche main guzar gaya wahan se

tu hai jaanashin-e-haidar tu hai markaz-e-saKHawat

tu ne kis qadar nawaza mujhe lutf-e-be-karan se

mujhe di hai apni chahat ye karam ye mehrbani

main ada-e-shukr tera karun kaun si zaban se

wahi KHub jaanta hai mera maqsad-e-tamanna

na uThae koi chilman mere un ke darmiyan se

mujhe jab se ho gai hai dar-e-yar se mohabbat

mujhe dekhti hai duniya ab nigah-e-bad-guman se

main 'nayab-warsi' hun ki sarapa raaz-e-ulfat

mera haal hoga zahir kabhi marg-e-na-gahan se