ہے تقاضۂ محبت نہ اٹھے سر آستاں سے

ہے تقاضۂ محبت نہ اٹھے سر آستاں سے

جہاں عقل تک نہ پہنچے میں گزر گیا وہاں سے

تو ہے جانشین حیدر تو ہے مرکز سخاوت

تو نے کس قدر نوازا مجھے لطف بیکراں سے

مجھے دی ہے اپنی چاہت یہ کرم یہ مہربانی

میں ادائے شکر تیرا کروں کون سی زباں سے

وہی خوب جانتا ہے میرا مقصد تمنا

نہ اٹھائے کوئی چلمن میرے ان کے درمیاں سے

مجھے جب سے ہو گئی ہے در یار سے محبت

مجھے دیکھتی ہے دنیا اب نگاہ بد گماں سے

میں نایابؔ وارثی ہوں کہ سراپا راز الفت

میرا حال ہوگا ظاہر کبھی مرگ ناگہاں سے