haif to chamka na dagh us dil ke rah kar aag mein

haif to chamkā na daaġh us dil ke rah kar aag meñ

ko.elā to haañ dahak jaatā hai aksar aag meñ

ishq kī daulat dil-e-muztar kā hai ghar aag meñ

kyuuñ na ho iksīr paara kushta ho gar aag meñ

tan pe gul khā kar huuñ maiñ sarv-e-charāġhāñ ishq meñ

ai chanār-e-bāġh apnī tū jalā kar aag meñ

ā.īne meñ dekh Tuk ḳhāl-e-lab-e-gulnār ko

mo.ajaze se husn ke chamke hai aḳhtar aag meñ

chashm-e-tar laḳht-e-dil-e-sozāñ se aañsū ko bujhā

tifl-e-abtar Daal de hai haath aksar haath meñ

mujmir-e-ātish hamārā sīna-e-pur-dāġh hai

yuuñ hai dil mahv-e-tamāshā ho ke ḳhush-tar aag meñ

dekhte the taḳhta-e-gul-hā-e-ātish kī bahār

jis tarah yaaro ḳhalīlullāh payambar aag meñ

ahl-e-jauhar kyā ajab hai huuñ jo sargarm-e-sitam

āhan-e-faulād kā bantā hai ḳhanjar aag meñ

mushaf-e-ruḳhsār-e-jānāñ ke hai bose kā sabab

jo nahīñ jaltī hai to ai zulf-e-kāfir aag meñ

varna har zunnār-dār-e-hindū-e-ātish-parast

āqibat dekhā hai ye phuñktā hai mar kar aag meñ

huuñ giraftār-e-qafas ai shola-e-āvāz dekh

mat jalā denā kahīñ tu baal aur par aag meñ

juuñ juuñ rotā huuñ bhaḌaktī ātish-e-dil hai do-chand

kār-e-roġhan ki na ashk-e-dīda-e-tar aag meñ

ai dil us chāh-e-zaqan meñ gir ke tū pairā kiyā

be-tāmmul kuud paḌte haiñ dilāvar aag meñ

ātishīñ ruḳh par tire dekhe araq-ālūd ḳhat

jis ne gar sabza kabhū dekhā na ho tar aag meñ

kūcha-e-dildār tū firdaus hai paik-e-sabā

uḌ ke pahuñche nāma-bar merā kabūtar aag meñ

par karāmat hai qabā-e-surḳh meñ terī kamar

varna mū sābit nahīñ rahtā hai dilbar aag meñ

ghar se apne ho ke muztar dauḌtā vo sho.ala-ḳhū

maiñ jalātā naqsh jab gar koī likh kar aag meñ

gar pilā duuñ zāhidā tujh ko mai-e-do-e-ātisha

pheñk de tū yak-qalam taqvā kā daftar aag meñ

ġharq āb-e-sharm ho sidd-e-sikandar dekh kar

reḳhte kā ghar banā tū vo suḳhan-var aag meñ

tan tab-e-ġham se tanūr-e-garm hai kis se kahūñ

kaun paḌtā hai kisī kī dīda-e-tar aag meñ

daaġh se phuktā jigar hai ātish-e-hijrāñ se dil

apnī apnī lau meñ jalte haiñ barābar aag meñ

fil-haqīqat hai ki sarrāfān-e-bāzārī 'nasīr'

sīm-o-zar ko mol lete haiñ tapā kar aag meñ

haif to chamka na dagh us dil ke rah kar aag mein

koela to han dahak jata hai aksar aag mein

ishq ki daulat dil-e-muztar ka hai ghar aag mein

kyun na ho iksir para kushta ho gar aag mein

tan pe gul kha kar hun main sarw-e-charaghan ishq mein

ai chanar-e-bagh apnī tu jala kar aag mein

aaine mein dekh Tuk KHal-e-lab-e-gulnar ko

moajaze se husn ke chamke hai aKHtar aag mein

chashm-e-tar laKHt-e-dil-e-sozan se aansu ko bujha

tifl-e-abtar Dal de hai hath aksar hath mein

mujmir-e-atish hamara sina-e-pur-dagh hai

yun hai dil mahw-e-tamasha ho ke KHush-tar aag mein

dekhte the taKHta-e-gul-ha-e-atish ki bahaar

jis tarah yaro KHalilullah payambar aag mein

ahl-e-jauhar kya ajab hai hun jo sargarm-e-sitam

aahan-e-faulad ka banta hai KHanjar aag mein

mushaf-e-ruKHsar-e-jaanan ke hai bose ka sabab

jo nahin jalti hai to ai zulf-e-kafir aag mein

warna har zunnar-dar-e-hindu-e-atish-parast

aaqibat dekha hai ye phunkta hai mar kar aag mein

hun giraftar-e-qafas ai shola-e-awaz dekh

mat jala dena kahin tu baal aur par aag mein

jun jun rota hun bhaDakti aatish-e-dil hai do-chand

kar-e-roghan ki na ashk-e-dida-e-tar aag mein

ai dil us chah-e-zaqan mein gir ke tu paira kiya

be-tammul kud paDte hain dilawar aag mein

aatishin ruKH par tere dekhe araq-alud KHat

jis ne gar sabza kabhu dekha na ho tar aag mein

kucha-e-dildar tu firdaus hai paik-e-saba

uD ke pahunche nama-bar mera kabutar aag mein

par karamat hai qaba-e-surKH mein teri kamar

warna mu sabit nahin rahta hai dilbar aag mein

ghar se apne ho ke muztar dauDta wo shoala-KHu

main jalata naqsh jab gar koi likh kar aag mein

gar pila dun zahida tujh ko mai-e-do-e-atisha

phenk de tu yak-qalam taqwa ka daftar aag mein

gharq aab-e-sharm ho sidd-e-sikandar dekh kar

reKHte ka ghar bana tu wo suKHan-war aag mein

tan tab-e-gham se tanur-e-garm hai kis se kahun

kaun paDta hai kisi ki dida-e-tar aag mein

dagh se phukta jigar hai aatish-e-hijran se dil

apnī apnī lau mein jalte hain barabar aag mein

fil-haqiqat hai ki sarrafan-e-bazari 'nasir'

sim-o-zar ko mol lete hain tapa kar aag mein