jalwa-ara kaun be-parda ye parda-posh hai

jalva-ārā kaun be-parda ye pardā-posh hai

zarra zarra bazm-e-hastī kā jo ab mad.hosh hai

aap kī tasvīr har-dam dil se ham-āġhosh hai

ya.anī vo behosh huuñ qurbān jis par hosh hai

rahmatoñ vaale se Takkar hai gunahgāroñ kī aaj

ham idhar ḳhāmosh haiñ aur vo udhar pur-josh hai

be-ḳhabar hone pe bhī hai saare aalam kī ḳhabar

aisī be-hoshī meñ mastānoñ ko aisā hosh hai

ham balā-noshoñ kī himmat ko tū ai saaqī na pūchh

donoñ-ālam sar pe rakh le jaa.eñ itnā josh hai

tah ko un gahrā.iyoñ kī paa.e kyā ġhavvās-e-aql

rūd-bār-e-ishq kā har qatra qulzum-nosh hai

jaane vaale phir unhīñ mastī bharī āñkhoñ se dekh

log kahte haiñ tire bīmār ko phir hosh hai

allāh allāh ik zamāna hai ḳharāb-e-ārzū

is nigāh-e-mast par sadqe matā-e-hosh hai

vaah kyā hairat-fazā manzar hai dil kī bazm kā

jalva-e-hairāñ se ab 'hairat' jo ham-āġhosh hai

husn vāloñ meñ bhī ab to ho rahe haiñ tazkire

sun rahe haiñ āj-kal 'hairat' kafan-bardosh hai

jalwa-ara kaun be-parda ye parda-posh hai

zarra zarra bazm-e-hasti ka jo ab madhosh hai

aap ki taswir har-dam dil se ham-aghosh hai

yani wo behosh hun qurban jis par hosh hai

rahmaton wale se Takkar hai gunahgaron ki aaj

hum idhar KHamosh hain aur wo udhar pur-josh hai

be-KHabar hone pe bhi hai sare aalam ki KHabar

aisi be-hoshi mein mastanon ko aisa hosh hai

hum bala-noshon ki himmat ko tu ai saqi na puchh

donon-alam sar pe rakh le jaen itna josh hai

tah ko un gahraiyon ki pae kya ghawwas-e-aql

rud-bar-e-ishq ka har qatra qulzum-nosh hai

jaane wale phir unhin masti bhari aankhon se dekh

log kahte hain tere bimar ko phir hosh hai

allah allah ek zamana hai KHarab-e-arzu

is nigah-e-mast par sadqe mata-e-hosh hai

wah kya hairat-faza manzar hai dil ki bazm ka

jalwa-e-hairan se ab 'hairat' jo ham-aghosh hai

husn walon mein bhi ab to ho rahe hain tazkire

sun rahe hain aaj-kal 'hairat' kafan-bardosh hai