hum apne mein tumko sanam dekhte hain

ham apne meñ tum ko sanam dekhte haiñ

sarāpā tumhīñ-tum ko ham dekhte haiñ

kuchh apne hī ko tum meñ gum-shud na paayā

tumheñ bhī to apne meñ ham dekhte haiñ

taḌap kar ye dilbar meñ rah jaatā hai

pareshāñ jo zulf-e-alam dekhte haiñ

mai-e-mehr meñ terī be-ḳhud haiñ ham

ḳhum-e-dil meñ josh-e-karam dekhte haiñ

duī se jo vā chashm-e-hairat huī

to īñ-āñ ko bhī kaladam dekhte haiñ

har ik shai meñ ho aur har haal meñ

na ho jis meñ tum vo adam dikhte haiñ

tan-o-jān-o-dil jumla-harkāt meñ

mire dil-rubā tum ko ham dekhte haiñ

kahūñ kyā maiñ 'mardāñ' nahīñ jā-e-guft

jo milne se un ke ye ham dekhte haiñ

hum apne mein tum ko sanam dekhte hain

sarapa tumhin-tum ko hum dekhte hain

kuchh apne hi ko tum mein gum-shud na paya

tumhein bhi to apne mein hum dekhte hain

taDap kar ye dilbar mein rah jata hai

pareshan jo zulf-e-alam dekhte hain

mai-e-mehr mein teri be-KHud hain hum

KHum-e-dil mein josh-e-karam dekhte hain

dui se jo wa chashm-e-hairat hui

to in-an ko bhi kaladam dekhte hain

har ek shai mein ho aur har haal mein

na ho jis mein tum wo adam dikhte hain

tan-o-jaan-o-dil jumla-harkat mein

mere dil-ruba tum ko hum dekhte hain

kahun kya main 'mardan' nahin ja-e-guft

jo milne se un ke ye hum dekhte hain