hum jis ko yaro apna ma’bud jaante hain

ham jis ko yaaro apnā mā’būd jānte haiñ

kaunain meñ usī ko maujūd jānte haiñ

aadam vo hai farishte karte haiñ jis ko sajde

munkir ko us ke ham to mardūd jānte haiñ

isbāt us kī hastī har chiiz meñ huī jab

nafī meñ apnī apnī bahbūd jānte haiñ

shāneñ usī kī sab haiñ ġhair-o-sivā kahāñ hai

is vāste sabhoñ ko masjūd jānte haiñ

un par khulī haiñ ramzeñ asrār do-jahāñ kī

jo ’aib aur hunar ko mahmūd jānte haiñ

buud un kī hai hamesha ai 'ishq ham se sun le

jo mā-sivā ko us ke nā-būd jānte haiñ

hum jis ko yaro apna ma’bud jaante hain

kaunain mein usi ko maujud jaante hain

aadam wo hai farishte karte hain jis ko sajde

munkir ko us ke hum to mardud jaante hain

isbaat us ki hasti har chiz mein hui jab

nafi mein apni apni bahbud jaante hain

shanen usi ki sab hain ghair-o-siwa kahan hai

is waste sabhon ko masjud jaante hain

un par khuli hain ramzen asrar do-jahan ki

jo ’aib aur hunar ko mahmud jaante hain

bud un ki hai hamesha ai 'ishq hum se sun le

jo ma-siwa ko us ke na-bud jaante hain