hum jurm-e-mohabbat ke gunahgar hain yaro

ham jurm-e-mohabbat ke gunahgār haiñ yaaro

pakḌe haiñ kiye apne ko lo gardaneñ maaro

mushkil hai jo chup rahte haiñ jī hotā hai bekal

vo yaar burā maane hai gar ro-ro pukāro

gar rāhat-o-ārām gayā jaane do ai dil

sābit raho Tuk 'ishq meñ himmat ko na haaro

darḳhvāst bhalā.ī kī falak se nahīñ behtar

duuñ himmatoñ aage na miyāñ haath pasāro

jaao jahāñ hai sāqī-e-sarmast-e-qadah-nosh

kyuuñ aa.e hue jhuk-jhuk mirī āñkhoñ meñ kHumāro

sair-e-chaman-e-husn meñ kyā lutf-o-mazā thā

kidhar se nikal aa.e tum ai hijr ke kHāro

jab tak nahīñ vo shoḳh tumheñ dekhe hai ḳhūbāñ

ḳhurshīd ke nikle pe kahāñ hoge sitāro

phūlī na samātī thī kahīñ añg meñ apne

aatī hai ḳhizāñ rahiyo ḳhabar-dār bahāro

ai shāh-e-najaf huuñ maiñ 'niyāz' aap ke ghar kā

bigḌe mire sab kaam tumhīñ aan sañvāro

hum jurm-e-mohabbat ke gunahgar hain yaro

pakDe hain kiye apne ko lo gardanen maro

mushkil hai jo chup rahte hain ji hota hai bekal

wo yar bura mane hai gar ro-ro pukaro

gar rahat-o-aram gaya jaane do ai dil

sabit raho Tuk 'ishq mein himmat ko na haaro

darKHwast bhalai ki falak se nahin behtar

dun himmaton aage na miyan hath pasaro

jao jahan hai saqi-e-sarmast-e-qadah-nosh

kyun aae hue jhuk-jhuk meri aankhon mein kHumaro

sair-e-chaman-e-husn mein kya lutf-o-maza tha

kidhar se nikal aae tum ai hijr ke kHaro

jab tak nahin wo shoKH tumhein dekhe hai KHuban

KHurshid ke nikle pe kahan hoge sitaro

phuli na samati thi kahin ang mein apne

aati hai KHizan rahiyo KHabar-dar bahaaro

ai shah-e-najaf hun main 'niyaz' aap ke ghar ka

bigDe mere sab kaam tumhin aan sanwaro