hum kyun ye kahen koi hamara nahin hota

ham kyuuñ ye kaheñ koī hamārā nahīñ hotā

maujoñ ke liye koī kinārā nahīñ hotā

dil TuuT bhī jaa.e to mohabbat nahīñ miTtī

is raah meñ luT kar bhī ḳhasārā nahīñ hotā

sarmāya-e-shab hote haiñ yuuñ to sabhī taare

har taarā magar sub.h kā taarā nahīñ hotā

ashkoñ se kahīñ miTtā hai ehsās-e-talavvun

paanī meñ jo ghul jaa.e vo paarā nahīñ hotā

sone kī tarāzū meñ mirā dard na taulo

imdād se ġhairat kā guzārā nahīñ hotā

tum bhī to 'muzaffar' kī kisī baat pe bolo

shā.er kā hī lafzoñ pe ijārā nahīñ hotā

hum kyun ye kahen koi hamara nahin hota

maujon ke liye koi kinara nahin hota

dil TuT bhi jae to mohabbat nahin miTti

is rah mein luT kar bhi KHasara nahin hota

sarmaya-e-shab hote hain yun to sabhi tare

har tara magar subh ka tara nahin hota

ashkon se kahin miTta hai ehsas-e-talawwun

pani mein jo ghul jae wo para nahin hota

sone ki taraazu mein mera dard na taulo

imdad se ghairat ka guzara nahin hota

tum bhi to 'muzaffar' ki kisi baat pe bolo

shaer ka hi lafzon pe ijara nahin hota