hamare jama-e-hasti ko ek din chaak hona tha

hamāre jāma-e-hastī ko ik din chaak honā thā

hue the ḳhaak se paidā hameñ phir ḳhaak honā thā

tire ġhamze terī sharmīlī āñkhoñ se ye kahte haiñ

tumheñ jallād honā thā tumheñ saffāk honā thā

azal se murġh-e-dil ko ḳhatra-e-sayyād kyā hotā

ki us ko to asīr-e-halqa-e-fitrāk honā thā

shab-e-vaslat na uThtā beach se kyuuñ sharm kā parda

hameñ khel khelnā thā aap ko bebāk honā thā

mere hī dāna-e-dil kī thiiñ nau nau chakkiyāñ dushman

mujhī ko surma pis pis kar tah-e-aflāk honā thā

havā-e-dāman-e-jānāñ na apnī ḳhaak tak pahuñchī

muqaddar meñ to mamnūn-e-mazār-e-pāk honā thā

adū kyūñkar na aa jaatā yakāyak bazm-e-ishrat meñ

use bashshāsh honā thā mujhe ġhamnāk honā thā

siyah-baḳhtī mirī bhī o qalam ham-dam na kyuuñ hotī

mere siine ko bhī tire hī sūrat chaak honā thā

na hotī dil meñ ulfat apnī kyuuñ qātil ke abrū kī

ki mujh ko to qatīl-e-ḳhanjar-e-saffāk honā thā

jalāludddīn-ahmad kyuuñ na jaatā 'arsh' duniyā se

mujhe marg-e-pisar meñ marte-dam ġhamnāk honā thā

hamare jama-e-hasti ko ek din chaak hona tha

hue the KHak se paida hamein phir KHak hona tha

tere ghamze teri sharmili aankhon se ye kahte hain

tumhein jallad hona tha tumhein saffak hona tha

azal se murgh-e-dil ko KHatra-e-sayyaad kya hota

ki us ko to asir-e-halqa-e-fitrak hona tha

shab-e-waslat na uThta beach se kyun sharm ka parda

hamein khel khelna tha aap ko bebak hona tha

mere hi dana-e-dil ki thin nau nau chakkiyan dushman

mujhi ko surma pis pis kar tah-e-aflak hona tha

hawa-e-daman-e-jaanan na apni KHak tak pahunchi

muqaddar mein to mamnun-e-mazar-e-pak hona tha

adu kyunkar na aa jata yakayak bazm-e-ishrat mein

use bashshash hona tha mujhe ghamnak hona tha

siyah-baKHti meri bhi o qalam ham-dam na kyun hoti

mere sine ko bhi tere hi surat chaak hona tha

na hoti dil mein ulfat apni kyun qatil ke abru ki

ki mujh ko to qatil-e-KHanjar-e-saffak hona tha

jalaludddin-ahmad kyun na jata 'arsh' duniya se

mujhe marg-e-pisar mein marte-dam ghamnak hona tha