hamare mah-jabin ko shauq hai zulfen banane ka

hamāre mah-jabīñ ko shauq hai zulfeñ banāne kā

falak tū panja-e-ḳhurshīd se le kaam shāne kā

milā kyā hazrat-e-ādam ko phal jannat se aane kā

na kyuuñ us ġham se siina chaak ho gandum ke daane kā

karūñ huuñ qasd haath us zulf ko jab maiñ lagāne kā

to dil kahtā hai hai ye kaam muñh par maar khāne kā

ye kyā hai kahkashāñ us ko nahīñ koī batāne kā

nishāñ hai pusht-e-shabdez-e-falak par tāziyāne kā

dil-e-majrūh ko dikhlā na tāb-e-chehra-e-raushan

ki zaḳhmī ko muzir hai chāñdnī ke maar jaane kā

nahīñ saa.e kī kuchh hājat siyah-kāroñ ke marqad par

kare hai abr-e-rahmat kaam dekho shāmiyāne kā

dilāo yaad us chashm-e-mufttin kī na ham-chashmo

nahīñ maiñ fitna-e-ḳhvābīda ko hargiz jagāne kā

vo hai mo.ajiz-numā gesū meñ aks-e-tāb-e-rū terā

yad-e-baizā se ham-sar ban gayā hai haat shāne kā

vo ā.īne meñ kyā aks-e-ruḳh-e-gulnār dekhe hai

hunar hai yaad us ko aag paanī meñ lagāne kā

nahīñ rakhtī hai ye fikr-e-ma.īshat kis ko gardish meñ

ki sañg-e-āsiyā bhī hai sadā muhtāj daane kā

dikhānā hai to dikhlā baam par Tuk jalva-e-sūrat

qayāmat ko nahīñ koī kisī ke kaam aane kā

'nasīr' is bahr meñ ab dūsrī likh kar ġhazal paḌhiye

tumhārā kaam hai mazmūn-e-nau ke bāñdh laane kā

hamare mah-jabin ko shauq hai zulfen banane ka

falak tu panja-e-KHurshid se le kaam shane ka

mila kya hazrat-e-adam ko phal jannat se aane ka

na kyun us gham se sina chaak ho gandum ke dane ka

karun hun qasd hath us zulf ko jab main lagane ka

to dil kahta hai hai ye kaam munh par mar khane ka

ye kya hai kahkashan us ko nahin koi batane ka

nishan hai pusht-e-shabdez-e-falak par taziyane ka

dil-e-majruh ko dikhla na tab-e-chehra-e-raushan

ki zaKHmi ko muzir hai chandni ke mar jaane ka

nahin sae ki kuchh hajat siyah-karon ke marqad par

kare hai abr-e-rahmat kaam dekho shamiyane ka

dilao yaad us chashm-e-mufttin ki na ham-chashmo

nahin main fitna-e-KHwabida ko hargiz jagane ka

wo hai moajiz-numa gesu mein aks-e-tab-e-ru tera

yad-e-baiza se ham-sar ban gaya hai hat shane ka

wo aaine mein kya aks-e-ruKH-e-gulnar dekhe hai

hunar hai yaad us ko aag pani mein lagane ka

nahin rakhti hai ye fikr-e-maishat kis ko gardish mein

ki sang-e-asiya bhi hai sada muhtaj dane ka

dikhana hai to dikhla baam par Tuk jalwa-e-surat

qayamat ko nahin koi kisi ke kaam aane ka

'nasir' is bahr mein ab dusri likh kar ghazal paDhiye

tumhaara kaam hai mazmun-e-nau ke bandh lane ka