hamein zamana hua un se dil lagae hue

hameñ zamāna huā un se dil lagā.e hue

adam se aa.e haiñ sar par ye bojh uThā.e hue

mujhī se chalte haiñ chāleñ mere sikhā.e hue

miTāne aa.e haiñ mujh ko mere banā.e hue

shab-e-visāl sahar ho ga.ī vo jaate haiñ

maiñ donoñ hāthoñ se baiThā huuñ dil dabā.e hue

ġhazab huā ke bhaḌak uThī ātish-e-ulfat

ye aag siine meñ the kab se ham dabā.e hue

ishāra kījiye teġh-e-nigah ko der hai kyā

ye kushtanī haiñ khaḌe gardaneñ jhukā.e hue

azal se ye dil majrūh hai shikār un kā

ham āj-kal se nahīñ tīr-e-ishq khaa.e hue

hamāre dil meñ hai sham.a ruḳh-e-sanam raushan

charāġh-e-dair se haiñ ham to lau lagā.e hue

dikhā do ik jhalak phir jamāl raushan kī

ham aaj hosh meñ haiñ muddatoñ parā.e hue

jache nazar meñ bhalā apnī kyā husain koī

nigāh meñ to mirī aap haiñ samā.e hue

jahāñ meñ ii.d thī kal jin kī diid kī ‘akbar’

paḌe haiñ aaj lahad meñ vo muñh chhupā.e hue

hamein zamana hua un se dil lagae hue

adam se aae hain sar par ye bojh uThae hue

mujhi se chalte hain chaalen mere sikhae hue

miTane aae hain mujh ko mere banae hue

shab-e-visal sahar ho gai wo jate hain

main donon hathon se baiTha hun dil dabae hue

ghazab hua ke bhaDak uThi aatish-e-ulfat

ye aag sine mein the kab se hum dabae hue

ishaara kijiye tegh-e-nigah ko der hai kya

ye kushtani hain khaDe gardanen jhukae hue

azal se ye dil majruh hai shikar un ka

hum aaj-kal se nahin tir-e-ishq khae hue

hamare dil mein hai shama ruKH-e-sanam raushan

charagh-e-dair se hain hum to lau lagae hue

dikha do ek jhalak phir jamal raushan ki

hum aaj hosh mein hain muddaton parae hue

jache nazar mein bhala apni kya husain koi

nigah mein to meri aap hain samae hue

jahan mein id thi kal jin ki did ki ‘akbar’

paDe hain aaj lahad mein wo munh chhupae hue