har aankh mein masti hai kahiye bhi to kya kahiye

har aañkh meñ mastī hai kahiye bhī to kyā kahiye

aur aap kī bastī hai kahiye bhī to kyā kahiye

har shai se kinārā bhī aur anjuman-ārā bhī

kyā aap kī hastī hai kahiye bhī to kyā kahiye

but-ḳhāne meñ din kaaTā maiḳhāne meñ shab guzrī

nashsha hai na mastī hai kahiye bhī to kyā kahiye

ye daur-e-sanam-parvar har shaḳhs yahāñ aazar

sahrā hai na bastī hai kahiye bhī to kyā kahiye

vo mahfil-e-rindāñ ho yā bazm-e-suḳhan-dāñ ho

ahbāb-parastī hai kahiye bhī to kyā kahiye

zāhid kī subuk-fitrat rindoñ pe hamesha se

āvāza hī kastī hai kahiye bhī to kyā kahiye

ahbāb kī āñkhoñ meñ jo uns kī nāgan hai

ahbāb ko Dastī hai kahiye bhī to kyā kahiye

ik jins-e-kudūrat thī jo pahle hī sastī thī

ab aur bhī sastī hai kahiye bhī to kyā kahiye

duniyā se 'azīz' us kī hotī hai mohabbat bhī

duniyā jise Dastī hai kahiye bhī to kyā kahiye

har aankh mein masti hai kahiye bhi to kya kahiye

aur aap ki basti hai kahiye bhi to kya kahiye

har shai se kinara bhi aur anjuman-ara bhi

kya aap ki hasti hai kahiye bhi to kya kahiye

but-KHane mein din kaTa maiKHane mein shab guzri

nashsha hai na masti hai kahiye bhi to kya kahiye

ye daur-e-sanam-parwar har shaKHs yahan aazar

sahra hai na basti hai kahiye bhi to kya kahiye

wo mahfil-e-rindan ho ya bazm-e-suKHan-dan ho

ahbab-parasti hai kahiye bhi to kya kahiye

zahid ki subuk-fitrat rindon pe hamesha se

aawaza hi kasti hai kahiye bhi to kya kahiye

ahbab ki aankhon mein jo uns ki nagan hai

ahbab ko Dasti hai kahiye bhi to kya kahiye

ek jins-e-kudurat thi jo pahle hi sasti thi

ab aur bhi sasti hai kahiye bhi to kya kahiye

duniya se 'aziz' us ki hoti hai mohabbat bhi

duniya jise Dasti hai kahiye bhi to kya kahiye