har ek jalwa hai mushtaq dilrubai mein

har ek jalva hai mushtāq dilrubā.ī meñ

ye kaisī luuT hai yārab tirī ḳhudā.ī meñ

bhaḌak rahe haiñ har ik samt tuur ke sho.ale

kamāl hai ye terī shān-e-ḳhud-numā.ī meñ

ba-yād-e-mast-nigāhī chashm piitā huuñ

bharī hai mai jo mire jām-e-pārsā.ī meñ

vahīñ pe Duub ke dil rah gayā ḳhudā kī qasam

uThī jo mauj kahīñ bahr-e-dilrubā.ī meñ

idhar to āñkhoñ meñ aañsū udhar ḳhayāl meñ vo

baḌe maze se kaTī zindagī judā.ī meñ

chhupā huā kahīñ ka.aba bhī but-kada meñ thā

ḳhudā milā hai mujhe but kī āshnā.ī meñ

vahī zamāna meñ 'qaisar' banā ḳhudā kī qasam

ki jis ne umr guzārī terī gadā.ī meñ

har ek jalwa hai mushtaq dilrubai mein

ye kaisi luT hai yarab teri KHudai mein

bhaDak rahe hain har ek samt tur ke shoale

kamal hai ye teri shan-e-KHud-numai mein

ba-yaad-e-mast-nigahi chashm pita hun

bhari hai mai jo mere jam-e-parsai mein

wahin pe Dub ke dil rah gaya KHuda ki qasam

uThi jo mauj kahin bahr-e-dilrubai mein

idhar to aankhon mein aansu udhar KHayal mein wo

baDe maze se kaTi zindagi judai mein

chhupa hua kahin kaba bhi but-kada mein tha

KHuda mila hai mujhe but ki aashnai mein

wahi zamana mein 'qaisar' bana KHuda ki qasam

ki jis ne umr guzari teri gadai mein