har jagah hota hai didar koi dekhe to

har jagah hotā hai dīdār koī dekhe to

haiñ har ik shakl meñ sarkār koī dekhe to

dil hī hai jalva-gah-e-yār koī dekhe to

āñkheñ haiñ rauzan-e-dīvār koī dekhe to

khul gayā parda-e-asrār koī dekhe to

nazar aane lagā dildār koī dekhe to

phir tire kākul-e-pechāñ kā ḳharīde saudā

pahle bik kar sar-e-bāzār koī dekhe to

nahnu-aqrab hī pe mauqūf nahīñ diid tirī

tū to har jā hai numūdār koī dekhe to

sun ke naale mere farmāte haiñ ḳhāmosh karo

kaun royā pas-e-dīvār koī dekhe to

parda-e-mahmil-e-jāñ kā mazā aatā hai

thaam kar dāman-e-kohsār koī dekhe to

haram-o-dair meñ rū-posh jo thā parda-nashīñ

phir rahā hai sar-e-bāzār koī dekhe to

nigah-e-mast ne saaqī tirī be-shīsha-o-jām

kar diyā hai hameñ sarshār koī dekhe to

samma-vajhul-lahi paḌhā jab to huā ye ma.alūm

ki hai har sū ruḳh-e-dil-dār koī dekhe to

har taraf ka.aba-e-ushshāq hai sajda ke liye

hai har ik dar dar-e-dildār koī dekhe to

bām-e-dildār kā ziina hai ye daar ai 'bedam'

de ke sar chaḌh ke sar-e-dār koī dekhe to

har jagah hota hai didar koi dekhe to

hain har ek shakl mein sarkar koi dekhe to

dil hi hai jalwa-gah-e-yar koi dekhe to

aankhen hain rauzan-e-diwar koi dekhe to

khul gaya parda-e-asrar koi dekhe to

nazar aane laga dildar koi dekhe to

phir tere kakul-e-pechan ka KHaride sauda

pahle bik kar sar-e-bazar koi dekhe to

nahnu-aqrab hi pe mauquf nahin did teri

tu to har ja hai numudar koi dekhe to

sun ke nale mere farmate hain KHamosh karo

kaun roya pas-e-diwar koi dekhe to

parda-e-mahmil-e-jaan ka maza aata hai

tham kar daman-e-kohsar koi dekhe to

haram-o-dair mein ru-posh jo tha parda-nashin

phir raha hai sar-e-bazar koi dekhe to

nigah-e-mast ne saqi teri be-shisha-o-jam

kar diya hai hamein sarshaar koi dekhe to

samma-wajhul-lahi paDha jab to hua ye malum

ki hai har su ruKH-e-dil-dar koi dekhe to

har taraf kaba-e-ushshaq hai sajda ke liye

hai har ek dar dar-e-dildar koi dekhe to

baam-e-dildar ka zina hai ye dar ai 'bedam'

de ke sar chaDh ke sar-e-dar koi dekhe to