haram aur dair ki jab se parastish chhoD di humne

haram aur dair kī jab se parastish chhoḌ dī ham ne

har ik zarre meñ dekhī sirf terī raushnī ham ne

ḳhushī to phir ḳhushī hai rañj ko samjhā ḳhushī ham ne

tirī ḳhātir badal Daalā nizām-e-zindagī ham ne

tumhārī shakl pahle bhī bahut hī ḳhūbsūrat thī

parastish karte karte baḳhsh dī raḳhshandagī ham ne

sanam-ḳhāne meñ but puuje haram meñ sajda-rezī kī

jo terī raah thī vo raah āḳhir DhūñDh lī ham ne

vafā kī raah meñ badnām donoñ kyuuñ hue socho

vafā kī raah chhoḌī hai kabhī tum ne kabhī ham ne

jahāñ tak bhī shu.ūr-e-āgahī ne dastaras paa.ī

vahāñ tak to sañvārā hai mazāq-e-bandagī ham ne

hamārī zindagī meñ husn hai naġhma hai shoḳhī hai

hasīnoñ meñ guzārī hai 'azīz-e-vārsī' ham ne

haram aur dair ki jab se parastish chhoD di hum ne

har ek zarre mein dekhi sirf teri raushni hum ne

KHushi to phir KHushi hai ranj ko samjha KHushi hum ne

teri KHatir badal Dala nizam-e-zindagi hum ne

tumhaari shakl pahle bhi bahut hi KHubsurat thi

parastish karte karte baKHsh di raKHshandagi hum ne

sanam-KHane mein but puje haram mein sajda-rezi ki

jo teri rah thi wo rah aaKHir DhunDh li hum ne

wafa ki rah mein badnam donon kyun hue socho

wafa ki rah chhoDi hai kabhi tum ne kabhi hum ne

jahan tak bhi shuur-e-agahi ne dastaras pai

wahan tak to sanwara hai mazaq-e-bandagi hum ne

hamari zindagi mein husn hai naghma hai shoKHi hai

hasinon mein guzari hai 'aziz-e-warsi' hum ne