dil mein aks-e-mushaf-e-ruKHsar-e-jaanan dekhiye

dil meñ aks-e-mus.haf-e-ruḳhsār-e-jānāñ dekhiye

ik na.ī sūrat se utrā hai ye qur.āñ dekhiye

chashm-e-bīnā se ḳhudā.ī bhar ke sāmāñ dekhiye

saarī duniyā saaf til-bhar meñ numāyāñ dekhiye

hai qiyāmat sham.a-e-be-fānūs honā aap kā

gul na hojāye charāġh-e-bazm-e-imkāñ dekhiye

us ne dīvāna samajh kar hashr meñ baḳhshā mujhe

kaam aayā hai kahāñ chāk-e-garebāñ dekhiye

parda baḌhte baḌhte āḳhir parda-dar ho jāygā

chhupte chhupte hoñge aap ik din numāyāñ dekhiye

muskurāyā maiñ jo kaliyoñ kī qabā.eñ dekh kar

hañs ke phūloñ ne kahā apnā garebāñ dekhiye

merī taskīñ ho na ho baat aap kī rah jā.egī

dard-e-dil go dekhne kī shai nahii. haañ dekhiye

ḳhāna-e-muflis meñ jaise jalte dekhe hoñ charāġh

yuuñ sitāre shām-e-ġham ke haiñ numāyāñ dekhiye

chhāle kahte haiñ lahū ro-ro ke ġhurbat par mirī

aur aage kyā dikhātā hai bayābāñ dekhiye

rah gayā thā mere armānoñ se jo lipTā huā

dil ke TukḌoñ meñ kahīñ hogā vo paikāñ dekhiye

gulshan-e-hastī do-rañgī kā muraqqa.a hai 'shafaq'

gul ko ḳhandāñ dekh kar shabnam ko giryāñ dekhiye

dil mein aks-e-mushaf-e-ruKHsar-e-jaanan dekhiye

ek nai surat se utra hai ye quran dekhiye

chashm-e-bina se KHudai bhar ke saman dekhiye

sari duniya saf til-bhar mein numayan dekhiye

hai qiyamat shama-e-be-fanus hona aap ka

gul na hojaye charagh-e-bazm-e-imkan dekhiye

us ne diwana samajh kar hashr mein baKHsha mujhe

kaam aaya hai kahan chaak-e-gareban dekhiye

parda baDhte baDhte aaKHir parda-dar ho jayga

chhupte chhupte honge aap ek din numayan dekhiye

muskuraya main jo kaliyon ki qabaen dekh kar

hans ke phulon ne kaha apna gareban dekhiye

meri taskin ho na ho baat aap ki rah jaegi

dard-e-dil go dekhne ki shai nahi han dekhiye

KHana-e-muflis mein jaise jalte dekhe hon charagh

yun sitare sham-e-gham ke hain numayan dekhiye

chhaale kahte hain lahu ro-ro ke ghurbat par meri

aur aage kya dikhata hai bayaban dekhiye

rah gaya tha mere armanon se jo lipTa hua

dil ke TukDon mein kahin hoga wo paikan dekhiye

gulshan-e-hasti do-rangi ka muraqqa hai 'shafaq'

gul ko KHandan dekh kar shabnam ko giryan dekhiye